“Wnes i orfodi fy rhieni i fynd â fi i Lerpwl ar gyfer clyweliad ar gyfer rhan bach yn y musical Beauty and the Beast”

Mae’r erthygl hon am ddim i bawb gael blas ar gynnwys y cylchgrawn. Beth am danysgrifio er mwyn darllen rhagor o’r cylchgrawn?

Pryd wnaethoch chi gychwyn actio?

Yn ifanc iawn, yn bump neu chwech oed, yn chwarae Oliver mewn sioe yn Ysgol Gynradd Pencarnisog.

Pan oeddwn i tua wyth oed wnes i orfodi fy rhieni i fynd â fi i Lerpwl ar gyfer clyweliad ar gyfer rhan bach yn y musical Beauty and the Beast, a dw i ddim yn gwybod sut, ond mi wnes i gael y rhan.

A dyna oedd y peth cyntaf proffesiynol i mi wneud.

Fues i yn gweithio eithaf tipyn efo S4C trwy gyfnod ysgol – Eldra, Treflan, Iechyd Da.

Ac roeddwn i yn actio ‘Liam’ yn Rownd a Rownd am wyth mlynedd, drwy ysgol uwchradd i gyd.

Beth sydd ar y gweill eleni?

Mae yna gyfres newydd dw i wedi bod yn brysur iawn yn gweithio arni yn cael ei darlledu, sef cyfres o’r enw Stad sydd yn rhyw fath o spin-off o’r hen gyfres boblogaidd Tipyn o Stad.

Dw i wedi bod yn lwcus i chwarae un o’r prif gymeriadau – fedra i ddim dweud mwy ar hyn o bryd!

Ond mae o’n gymeriad sydd wedi bod yn lot o hwyl i mi, fel actor.

Ydach chi’n cofio’r Tipyn o Stad gwreiddiol (fu ar S4C rhwng 2002 a 2008)?

Doeddwn i ddim yn ei wylio fo ar y pryd, roeddwn i ychydig bach yn ifanc.

Ond dw i wedi ei wylio fo ar Clic ac mae’r cymeriadau yn ffantastig, a dw i’n edrych ymlaen at weld be’ fydd pobol yn feddwl o Stad.

Pa waith actio arall fuoch chi’n ei wneud yn ddiweddar?

Dros y Dolig ro’n i yn gweithio efo Theatr Clwyd a Pontio, yn gwneud sioe i blant.

Mae o’n rhywbeth dw i’n ei wneud pob blwyddyn ers pedair blynedd, ac mae’r cynhyrchiad wedi tyfu a thyfu.

Y tro yma wnaethon ni sioe Gwrach yr Iâ yn Gymraeg ac yn Saesneg.

Roedd yn brofiad gwych cael fy nghyflogi fel actor a cherddor, yn cyfansoddi’r caneuon yn ogystal â pherfformio, canu, chwarae gitâr a thrio dawnsio!

Sut brofiad yw ceisio diddanu plant?

Wel, efo’r sioe yma roedden ni yn trio cael y plant yn rhan ohono fo, yn gofyn mwy ohonyn nhw na be’ fysa chi o gynulleidfa o oedolion.

Fysa ni yn dysgu cân iddyn nhw ar y dechrau, a dweud: ‘Canwch y gân yma os ydach chi eisiau help’.

Ac wedyn pan roedd rhywbeth yn digwydd i’r prif gymeriad, roedd y plant yn syth bin yn dechrau canu’r gân, a bysa help yn dod!

Dyna fydda profiad theatr cynta’ lot o’r plant yna, ac mae yn bwysig eu bod nhw’n cael y profiadau yna yn gynnar.

Oes yna hanes o actio yn y teulu?

Roedd fy mam, Mandy Roberts, yn actio, cyn i mi gael fy ngeni… dw i wastad yn mwydro pobol mai fy job gynta’ oedd ar C’Mon Midffîld – Y Mwfi. Achos roedd mam yn hwnna, yn actio mam Wali Tomos yn ifanc, ac roedd hi’n feichiog efo fi ar y pryd.

Felly dw i’n dweud wrth bawb mai honna oedd job gynta’ fi, achos roeddwn i yn bol mam!

Sut brofiad oedd mynd i Lundain i astudio yn y London Academy of Music & Dramatic Art?

Dipyn o sioc am yr wythnosau cyntaf – ‘ydw i i fod yma?’ math o beth.

Ond wnaeth hi ond cymryd ychydig fisoedd i fi sylweddoli pa mor wych oedd y lle a wnes i wir fwynhau. Yr hiraf yn y byd roeddwn i yna, y mwyaf roeddwn i yn mwynhau.

Beth yw eich hoff ffilm?

Y ffilm gyntaf gafodd afael arna fi oedd Rocky.

Ers faint ydach chi’n cefnogi rhanbarth rygbi Caerdydd?

Dilyn Cymru’r oeddwn i i ddechrau, a tra yn coleg wnes i ddechrau dilyn y rhanbarthau i gyd – mynd i weld y gemau mewn sports bars yn Llundain.

Ac am ryw reswm na fedra i egluro, wnes i jesd shifftio i gefnogi Caerdydd yn fwy a fwy.

A dw i bellach yn byw yma, ac wedi bod efo tocyn tymor cwpwl o weithiau.

Beth yw eich atgof cynta’?

Eistedd ar lin fy mam yn sleidio lawr y grisiau yn ein tŷ cyntaf ni yn Llangefni.

Beth yw eich ofn mwya’?

Môr agored.

Beth ydych chi’n ei wneud i gadw’n heini?

Fydda i’n mynd i’r jim bob hyn a hyn, a rhedeg. Dw i wedi gwneud hanner marathon Caerdydd. Efallai wna i farathon rhyw ddiwrnod…

Beth sy’n eich gwylltio?

Dim llawer… pobol yn siarad am bobl eraill, efallai, neu’r newyddion.

Pwy fyddech chi’n gwahodd i’ch pryd bwyd delfrydol… a beth fyddai’r wledd?

Christopher Nolan – i mi gael rhoi fy CV iddy fo.

Y diweddar actor Robin Williams.

Dax Shepard – actor a digrifwr dw i wedi bod yn gwrando arno ar ei bodlediad.

A Vietnamese curry i’w fwyta.

Gan bwy gawsoch chi sws gorau eich bywyd?

Fy nghariad, wrth gwrs!

Wnaethon ni gyfarfod yn y côr yn [Ysgol] Glanaethwy.

Pa air neu ddywediad ydych chi’n gorddefnyddio?

Fatha.

Hoff albwm?

Dark Side Of The Moon neu Wish You Were Here gan Pink Floyd.

Hoff ddiod feddwol?

Wisgi coctel.

Pa fath o swyddi ydech chi wedi eu gwneud rhwng y jobsus actio?

Rydw i wedi gweithio mewn sawl caffi, wedi gweithio mewn events yn Llundain, yn gweini bwyd.

Fysa chi yn Wembley un diwrnod, art gallery y diwrnod wedyn, ac mewn house party rywun efo lot o bres y diwrnod wedyn – boncyrs!

Ddes i ar draws ambell aelod o’r Teulu Brenhinol ac ambell i ffwtbolar, ond dw i ddim yn dda iawn efo pêl-droed, felly fyswn i ddim yn gallu dweud pwy oedden nhw.

A dw i wedi bod yn painter and decorator, wedi delifro gwin mewn fan, a gweithio mewn clwb nos…