Blas o’r Bröydd

Mae’r erthygl hon am ddim i bawb gael blas ar gynnwys y cylchgrawn. Beth am danysgrifio er mwyn darllen rhagor o’r cylchgrawn?

Da ‘Di Disgo!

Pwy sylwodd ar seren yn dawnsio disgo’n ddi-dor ddechrau’r mis? Do, aeth Llŷr Ifans, yr actor sy’n byw yn y Felinheli, ati i godi arian mewn ffordd go unigryw – dawnsio disgo am wyth awr ar gae Ysgol y Felinheli! Yn ôl Lisa Gwilym, cadeirydd Cyfeillion Ysgol y Felinheli a gwraig Llŷr, “mae wedi bod yn amhosib trefnu gweithgareddau hwyliog ar gyfer disgyblion yr ysgol eleni oherwydd y pandemig, ac yn sgil hynny mi’r oedd coffrau’r Cyfeillion yn eitha’ llwm.”

Roedd Llŷr a Lisa yn awyddus bod pob disgybl yn cael y cyfle i ddewis cân ar gyfer y rhestr chwarae – disgo i’r plant wedi’i greu gan y plant! Roedd yn ddiwrnod llawn hwyl i gasglu arian oedd wir ei angen i brynu llyfrau ac offer digidol ar gyfer disgyblion yr ysgol . Llwyddwyd i godi dros £4,500, ac mae modd cyfrannu eto – ewch i BangorFelin360.

Blas o’r Bröydd

Dyma flas o’r fideos, blogs ac erthyglau sydd wedi’u cyhoeddi ar rwydwaith Bro360 yn yr wythnos ddiwethaf

Sgiliau arbennig teulu Awelon wrth chwarae dartiau

Mae gan deulu Awelon o Lanbed ddawn arbennig wrth chwarae dartiau – dawn sydd wedi’u galluogi i fynd i Gibraltar i gystadlu mewn ffeinals byd-eang yr haf hwn.

Yno, bu’r teulu o bedwar yn llwyddiannus iawn yn eu cystadlaethau categori oedran, gyda Llinos yn ennill £75 ar ôl cyrraedd yr 16 olaf, a Brynmor yn ennill £150 ar ôl cyrraedd y chwarter olaf. Mae’r cyfan wedi bod yn brofiad anhygoel i’r teulu, ac maent yn gobeithio cael cystadlu mwy yn lleol yn 2021. Ewch i Clonc360 i ddarllen rhagor.

Bro

Sgiliau arbennig teulu Awelon wrth chwarae dartiau

Dan ac Aerwen

Y pedwar yn cymryd rhan mewn cystadlaethau rhyngwladol yn Gibraltar.

Paentio’r mart yn goch!

Daeth llawer o’r gymuned amaethyddol yn ardal Pontarfynach ynghyd yn ddiweddar i dorchi llewys a phaentio pob twll a chornel o’r farchnad ddefaid.

Yn ôl James Raw, “braf oedd gweld cymaint yn ymgynnull, gan gadw pellter cymdeithasol wrth gwrs, a chwblhau’r gwaith o baentio, tacluso a sgrwbio.” Mae’n cymryd y cyfle i rannu ychydig o hanes ‘Mart y Brij’, yr arwerthwr a’r seli defaid mawr hefyd ar ei wefan fro.

Mae’r arfer o ddod ynghyd fel criw i gwblhau gwaith yn rhan o wead bywyd cefn gwlad. Ond mae’r lluniau’n dangos bod digon o joio yn digwydd, yn ogystal â gweithio!