Pam fod diddanwr wedi rhoi’r gorau i gynnal her bwyta malws melys?

Bu farw Natalie Buss, 37, ar ôl iddi gymryd rhan mewn cystadleuaeth bwyta malws melys yng Nghlwb Rygbi Beddau, Rhondda Cynon Taf ar Hydref 7 y llynedd.

Yr her oedd gweld faint o’r malws melys y gallai hi eu rhoi yn ei cheg o fewn munud.

Roedd y gystadleuaeth yn rhan o noson codi arian yn y clwb.

Clywodd adolygiad cyn cwest ym Mhontypridd yr wythnos hon fod Natalie Buss, oedd yn fam i ddau o blant, wedi mynd ar y llwyfan ac wedi llyncu dwsinau o’r malws melys cyn cael ei tharo’n wael ar ôl iddi adael y llwyfan.

Er gwaethaf ymdrechion i’w hachub, bu farw cyn i barafeddygon allu ei helpu.

Roedd yr adolygiad cyn cwest ym Mhontypridd ddydd Mercher (Medi 11) wedi clywed bod y Gweithgor Iechyd a Diogelwch wedi cael gwybod am y farwolaeth. Oherwydd hyn bydd y cwest yn cynnwys rheithgor.

Yn aml, mae cwestau yn cynnwys rheithgor pan fydd marwolaeth rhywun yn digwydd mewn amgylchiadau y gellid eu hystyried yn ‘amheus, yn ddadleuol, neu sydd â goblygiadau ehangach i’r cyhoedd’.

Bydd y cwest yn ystyried asesiadau risg gafodd eu cynnal cyn y gêm a’r camau gafodd eu cymryd i leihau’r risg o gynnal y gystadleuaeth.

Dywedodd y crwner cynorthwyol, Gavin Knox y bydd yn asesu beth ddigwyddodd wrth i Natalie Buss chwarae’r gêm, yn ogystal ag achos meddygol ei marwolaeth.

Mae disgwyl i’r cwest gael ei gynnal y flwyddyn nesaf.

Mae’r diddanwr a DJ profiadol oedd wedi trefnu’r gystadleuaeth wedi cael ei holi gan yr heddlu, a chlywodd yr adolygiad cyn cwest fod disgwyl iddo roi tystiolaeth yn y cwest, ynghyd â nyrs oedd wedi ceisio helpu Natalie Buss ar y noson.

Mae’r diddanwr bellach wedi rhoi’r gorau i gynnal yr her mewn digwyddiadau ers y drasiedi.