Bydd mwy o athletwyr o Gymru’n cystadlu yn y Gemau Olympaidd eleni nag sydd wedi gwneud ers dros ganrif.

Fe fydd 31 o athletwyr o Gymru’n rhan o dîm Prydain yn y Gemau yn Paris.

Dim ond unwaith o’r blaen, yn 1908 – pan oedd y gemau yn Llundain – mae mwy o athletwyr o Gymru wedi cymryd rhan.

Fe wnaeth 32 o Gymry gystadlu bryd hynny, ond roedd gan Gymru ei thîm hoci ei hun, ddaeth yn drydydd.

Bydd seremoni agoriadol y Gemau Olympaidd yn cael ei chynnal heno (nos Wener, Gorffennaf 26), a hynny ar hyd afon Seine – y tro cyntaf i’r seremoni agoriadol gael ei chynnal tu allan i stadiwm.

Fe fydd dros 100 o gychod yn cario tua 10,500 o athletwyr ar hyd y Seine, a bron i 600,000 o bobol yn gwylio ar y lan.

Yr athletwyr

Athletau

Jeremiah Azu o Gaerdydd – ras 100m y dynion, ras gyfnewid 4x100m y dynion.

Paffio

Rosie Eccles o Gil-y-coed, Sir Fynwy – 66kg menywod

Seiclo

Elinor Barker o Gaerdydd – tîm Cwrso Carfan (pursuit) y menywod, madison y menywod

Emma Finucane o Gaerfyrddin – ras wib y menywod, tîm ras wib y menywod, keirin y menywod

Ella Maclean-Howell o Lantrisant, Rhondda Cynon Taf – beicio mynydd trawsgwlad y menywod

Anna Morris o Gaerdydd – tîm Cwrso Carfan y menywod, ras ffordd y menywod

Jess Roberts o Gaerfyrddin – tîm Cwrso Carfan y menywod

Josh Tarling o Aberaeron – ras yn erbyn y cloc y dynion, ras ffordd y dynion

Stevie Williams o Aberystwyth – ras ffordd y dynion

Gymnasteg

Ruby Evans o Gaerdydd – gymnasteg artistig y menywod

Hoci

Jacob Draper o Gwmbrân – tîm hoci’r dynion

Gareth Furlong o Gaergrawnt – tîm hoci’r dynion

Rupert Shipperley o Rydychen – tîm hoci’r dynion

Sarah Jones o Gaerdydd – tîm hoci’r menywod

Rhwyfo

Matt Aldridge o Dorset – rhwyfo fesul pedwar y dynion

Tom Barras o Staines (cymhwysodd i gystadlu dros Gymru pan oedd yn y brifysgol) – sgwlio fesul pedwar y dynion

Harry Brightmore o Gaer – rhwyfo fesul wyth y dynion

Eve Stewart o Amsterdam – rhwyfo fesul wyth y menywod

Graeme Thomas o Preston – sgwlio fesul pedwar y dynion

Becky Wilde o Taunton – sgwlio fesul dwy

Ollie Wynne-Griffith o Guildford – rhwyfo fesul pâr y dynion

Rygbi Saith Bob Ochr

Jasmine Joyce o Dyddewi – tîm rygbi saith bob ochr y menywod

Hwylio

Micky Beckett o Solfach, Sir Benfro – dinghy’r dynion

Chris Grube o Gaer – dinghy cymysg

Nofio

Kieran Bird o Bicester – 400m nofio rhydd y dynion

Medi Harris o Borthmadog – 100m dull cefn y menywod, ras gyfnewid nofio rhydd 4x200m y menywod

Daniel Jarvis o Resolfen – 1500m nofio dull rhydd y dynion

Hector Pardoe o Wrecsam – nofio marathon y dynion

Matt Richards o Droitwich – 100m nofio dull rhydd y dynion, 200m nofio dull rhydd y dynion, ras gyfnewid nofio dull rhydd 4x100m y dynion, ras gyfnewid nofio dull rhydd 4x200m y dynion, medli 4x100m y dynion

Tennis bwrdd

Anna Hursey o Gaerfyrddin – gemau sengl y menywod, gemau dwbl cymysg

Taekwondo

Jade Jones o’r Fflint – -57kg y menywod

Athletwyr wrth gefn

Lowri Thomas (seiclo trac), Megan Barker (seiclo trac), Kayleigh Powell (rygbi saith bob ochr).

‘Ysbrydoli pobol ifanc’

Wrth ddymuno’r gorau i’r athletwyr, dywed Vaughan Gething, Prif Weinidog Cymru, eu bod nhw am roi “sylw arbennig i’r athletwyr o Gymru – y nifer fwyaf ers dros 100 mlynedd”. 

“Pob lwc i’n holl athletwyr sy’n cystadlu yng Ngemau Olympaidd Paris,” meddai.

“Mae pob un ohonoch wedi gweithio’n galed dros ben i fod yno, gan gyrraedd y brig yn eich camp.

“Rydych chi’n ysbrydoli ein pobol ifanc.

“Llongyfarchiadau.

“Chi yw Sêr Olympaidd Cymru, eleni ac am byth.”