George North
Mae asgellwr Cymru, George North, wedi cyfaddef fod y gêm yn erbyn Iwerddon wedi bod yn un rwystredig iddo.
Roedd yr ornest ar ben erbyn hanner amser a dywedodd y cawr o asgellwr iddo geisio’n ofer i gael mwy o’r bêl yn ei ddwylo.
““Roeddwn i’n teimlo ar adegau fod pawb wedi cyffwrdd yn y bêl heblaw amdana i,” meddai wrth Golwg360.
“Fel yna mae hi mewn rygbi ar adegau.”
Cafodd Cymru gyfleoedd i sgorio sawl cais yn yr ail hanner ond doedden nhw ddim mor gywir â’r Gwyddelod.
“Roedd ganddon ni ychydig o broblemau cyfathrebu a bydd hynny’n rhywbeth y bydd yn rhaid i ni wella dros yr wythnos nesaf,” meddai George North.
North yn ganolwr?
Mae Cymru’n cwrdd â Ffrainc nos Sadwrn ym Mharis, a’r tîm cartref yn chwilio am fuddugoliaeth gyntaf hefyd. Mae symud North i chwarae yn ganolwr yn opsiwn i hyfforddwyr Cymru, gyda’r tîm yn cael ei gyhoeddi yfory, ond dywedodd yr asgellwr o Ynys Môn fod cystadleuaeth chwyrn am y safle.
“Mae safon y canolwyr yn uchel, gyda Jamie (Roberts), Scott (Williams) a Jonathan (Davies) yn cystadlu am eu lle, felly dwi’m yn siŵr os oes cyfle i mi chwarae yna ond gawn ni weld.
“Fydd hi ddim yn hawdd mynd allan i Ffrainc ar ôl gêm fel un Iwerddon,” cyfaddefodd.
“Mae hi’n anodd iawn chwarae oddi cartref yn Ffrainc, mewn chwip o stadiwm. Ond mae’r bois i gyd yn edrych ymlaen.”
Stori: Owain Gruffudd
