Caerwysg 30–20 Scarlets
Colli fu hanes y Scarlets am y pedwerydd tro yng ngrŵp 5 Cwpan Heineken brynhawn Sadwrn wrth i Gaerwysg eu curo ar Barc Sandy.
Fe wnaeth y Cymry daro’n ôl yn dilyn dechrau da’r tîm cartref ac roeddynt yn gyfartal am gyfnod yn yr ail hanner, ond gorffennodd Caerwysg yn gryf gan ennill y gêm gyda chais hwyr.
Hanner Cyntaf
Dechreuodd y tîm cartref yn dda ac roeddynt ar y blaen wedi dim ond pedwar munud diolch i gais y canolwr, Ian Whitten, a throsiad y maswr, Gareth Steenson.
Aeth pethau o ddrwg i waeth i’r Scarlets funud yn ddiweddarach pan welodd Liam Williams gerdyn melyn. A gyda chefnwr y Cymry yn y gell gosb, fe giciodd Steenson ei dîm dri phwynt ym mhellach ar y blaen.
Ymatebodd Aled Thomas gyda chic gosb i’r Scarlets ond buan iawn y dilynodd ail gais Caerwysg. Y bachwr, Simon Alcott, oedd y sgoriwr y tro hwn ac roedd gan y tîm cartref bedwar pwynt ar ddeg o fantais yn dilyn trosiad Steenson.
Cyfle Caerwysg i chwarae gydag un yn llai oedd hi wedyn wrth i’r clo, James Hanks, dreulio deg munud yn y gell gallio.
Ac er i’r Scarlets fethu manteisio yn ystod y cyfnod hwnnw fe wnaeth Ken Owens dirio cais cyntaf yr ymwelwyr bum munud cyn yr egwyl. 17-13 yn dilyn trosiad Thomas a Bois y Sosban yn ôl yn y gêm.
Ond Caerwysg a Steenson gafodd y gair olaf cyn yr egwyl wrth i’r Gwyddel drosi tri phwynt arall i ymestyn y fantais i saith pwynt.
Ail Hanner
Sgoriodd Scott Williams wedi dim ond dau funud o’r ail hanner ac roedd y Scarlets yn gyfartal ar ôl trosiad Thomas, 20-20 gyda bron i hanner y gêm i fynd.
Ond tawelodd pethau wedi hynny ac wedi i Steenson roi Caerwysg yn ôl ar y blaen gyda chic gosb ar yr awr, fe sicrhaodd y blaenasgellwr cartref, James Scaysbrook, y fuddugoliaeth gyda chais yn y munud olaf.
Mae’r canlyniad yn gadael y Scarlets ar waelod grŵp 5 gyda dau bwynt yn unig.
.
Caerwysg
Ceisiau: Ian Whitten 4’, Simon Alcott 16’, James Scaysbrook 79’
Trosiadau: Gareth Steenson 4’, 16’, 79’
Ciciau Cosb: Gareth Steenson 8’, 40’, 61’
Cerdyn Melyn: James Hanks 22’
.
Scarlets
Ceisiau: Ken Owens 35’, Scott Williams 42’
Trosiadau: Aled Thomas 35’, 42’
Ciciau Cosb: Aled Thomas 11’, 25’
Cerdyn Melyn: Liam Williams 5’
