Pontypridd yn gwrthod cyfle i gynnal gemau’r Gleision

Jamie Roberts
Fe gadarnhaodd Prif Weithredwr clwb rygbi Pontypridd heddiw  bod ei glwb wedi gwrthod y cyfle i gynnal gemau Cwpan LV y Gleision.

Ond dywedodd Steve Reardon nad ydyn nhw wedi diystyrru cynnal gemau’r Gleision  yn y dyfodol.

Ddoe, fe wnaeth y Gleision gynnal sesiwn hyfforddi llwyddiannus ym Mhenygraig, gan obeithio cynnal dwy gêm o’r Cwpan LV yn Heol Sardis.

Daeth 1,000 o blant ysgol ac oedolion i weld  sêr rhyngwladol fel Alex Cuthbert, Jamie Roberts a Sam Warburton yn ymarfer.

Roedd Richard Holland, Prif Weithredwr y Gleision a Phil Davies, rheolwr y Gleision yn awyddus i ddatblygu rygbi yn y cymunedau  ac yn yr ysgolion tu hwnt i Gaerdydd.

‘Siom’

Cafwyd bach o siom wrth i’r cynnig gael ei wrthod.

‘‘Gobeithio y gallwn ailennyn y cynnig yn y dyfodol.  Byddai unrhyw un yn bresennol ddoe wedi cadarnhau ei bod yn ddydd llwyddiannus dros ben.  Daeth plant o tua 33 o ysgolion dros y rhanbarth, cawsom groeso ac ymateb anhygoel,’’ meddai Richard Holland wrth Wales Online.

‘‘Rydym yn gwneud ein rhan i geisio cysylltu’r Gleision a phawb yn y rhanbarth.  Am ei bod yn ddydd hynod o lwyddiannus, hoffwn wneud yr un peth mewn mannau eraill yn y rhanbarth,’’ ychwanegodd.

Dywedodd Steve Reardon: ‘‘Fe wrthodon ni’r cynnig oherwydd ni chawsom y cyfle o’r blaen, mae angen i ni edrych ar y camau cyntaf.  Er nad ydym  wedi derbyn y cynnig, nid ydym am anghofio’r cynnig ar gyfer cynnal gemau’r Gleision.”