Cymru 9–6 Awstralia
Cymru a aeth â hi mewn gêm agos yn erbyn Awstralia yn y stadiwm cenedlaethol yng Nghaerdydd nos Sadwrn (Tachwedd 10).
Er nad oedd hi’n glasur, roedd hi’n well gêm na’r hyn yr oedd y sgôr isel yn ei awgrymu, a doedd fawr o syndod mai un sgôr a wahanodd y ddau dîm yn y diwedd.
Cyfartal, tri phwynt yr un, a oedd hi ar hanner amser wedi cic gosb yr un gan Leigh Halfpenny a Bernard Foley.
Dylai Cymru fod wedi bod ar y blaen serch hynny gan i Halfpenny fethu gyda dau gynnig arall, un o’r rheiny yn gic syml o flaen y pyst.
Roedd hi’n gêm well wedi’r egwyl a Chymru a oedd yn edrych yn fwyaf tebygol o groesi am gais ond roedd amddiffyn Awstralia yn drefnus ac effeithiol.
Bu rhaid aros tan y chwarter awr olaf am bwyntiau cyntaf yr hanner, cic gosb gan Halfpenny yn rhoi Cymru yn ôl ar y blaen cyn i Matt Toomua unioni pethau drachefn.
Daeth un cyfle arall i Gymru ei hennill hi yn y munudau olaf, a gyda Leigh Halfpenny oddi ar y cae, rhoddwyd y cyfrifoldeb hwnnw i’r eilydd Dan Biggar.
Anelodd yntau’n gywir gan sicrhau buddugoliaeth i Gymru, y gyntaf dros Awstralia mewn deg mlynedd.
.
Cymru
Ciciau Cosb: Leigh Halfpenny 22’, 68’, Dan Biggar 77’
.
Awstralia
Ciciau Cosb: Bernard Foley 34’, Matt Toomua 75’
