Scarlets 20–8 Treviso
Parhau y mae dechrau da’r Scarlets i’r tymor yn y Guinness Pro14 yn dilyn buddugoliaeth dros Treviso nos Wener.
Nid oedd hi’n glasur ar Barc y Scarlets ond fe wnaeth y tîm cartref ddigon i drechu’r Eidalwyr diolch i geisiau Dan Jones a Scott Williams.
Ciciodd Jones bwyntiau cyntaf y gêm wedi pum munud, a’r maswr cartref a groesodd am gais cyntaf y noson wyth munud yn ddiweddarach hefyd, yn ffugio’n effeithiol cyn croesi o dan y pyst, 10-0 wedi’r trosiad.
Caeodd Ian McKinley’r bwlch gyda chic gosb i Treviso ac roedd yr Eidalwyr yn rhoi dipyn o gêm i Fois y Sosban.
Wedi dweud hynny, roedd deg pwynt ynddi eto ar yr egwyl diolch i dri phwynt arall o droed Jones.
Hanner cyntaf i’r maswyr oedd hi a chais i rif deg yr ymwelwyr oedd sgôr gyntaf yr ail hanner hefyd, McKinley yn bylchu trwy amddiffyn y Scarlets yn rhy rhwydd o lawer wedi lein ar y llinell 22 medr.
Un sgôr a oedd yn gwahanu’r timau wedi hynny a bu rhaid aros tan ddeuddeg munud o’r diwedd cyn i gais Scott Williams roi golau dydd rhyngddynt eto, y capten cartref yn casglu cic ddeheuig Jones cyn tirio.
Rhoddodd trosiad Jones ddeuddeg pwynt o fantais i’r Cymry ac felly yr arhosodd hi tan y diwedd.
Mae’r canlyniad yn cadw’r Scarlets ar frig Cyngres B y Pro14.
.
Scarlets
Ceisiau: Dan Jones 13’, Scott Williams 68’
Trosiadau: Dan Jones 14’, 69’
Ciciau Cosb: Dan Jones 5’, 32’
.
Treviso
Cais: Ian McKinley 44’
Cic Gosb: Ian McKinley 17’
Cerdyn Melyn: Andrea Bronzini 58’
