Toulouse 15–17 Gleision
Parhau mae dechreu da’r Gleision yng Nghwpan Her Ewrop wedi iddynt drechu Toulouse yn y Stade Ernest Wallon nos Wener.
Macauley Cook a sgoriodd y cais holl bwysig wrth i’r Gleision ennill eu hail gêm mewn wythnos yng ngrŵp 2.
Rhoddodd cic gosb Romain Ntamack Toulouse ar y blaen cyn i’r Gleision daro nôl gyda chais i Nick Williams wedi sgarmes symudol.
Llwyddodd Jarrod Evans gyda’r trosiad cyn ychwanegu cic gosb i ymestyn mantais ei dîm i saith pwynt.
Y tîm cartref a orffennodd yr hanner gryfaf serch hynny gyda cheisiau Romain Ntamack ac Antoine Dupont yn eu rhoi bum pwynt ar y blaen wrth droi.
Roedd y Gleision yn gyfartal wedi deg munud o’r ail hanner pan groesodd Cook yn dilyn gwaith creu Evans a Dillon Lewis.
Rhoddodd trosiad Evans yr ymwelwyr ddau bwynt ar y blaen ac er bod hanner awr i fynd, felly yr arhosodd hi tan y diwedd.
Mae’r fuddugoliaeth yn rhoi’r Gleision bum pwynt yn glir o’r gweddill ar frig grŵp 2 wedi dwy gêm.
.
Toulouse
Ceisiau: Romain Ntamack 27’, Antoine Dupont 35’
Trosiad: Romain Ntamack 28’
Cic Gosb: Romain Ntamack 11’
Cerdyn Melyn: Rynhardt Elstadt 66’
.
Gleision
Ceisiau: Nick Williams 15’, Macauley Cook 51’
Trosiadau: Jarrod Evans 15’, 51’
Cic Gosb: Jarrod Evans 21’
Cardiau Melyn: Alex Cuthbert 30’, Steve Shingler 66’
