Gweilch 71–3 Grenoble
Mae lle’r Gweilch yn wyth olaf Cwpan Her Ewrop yn ddiogel yn dilyn buddugoliaeth swmpus yn erbyn Grenoble ar y Liberty brynhawn Sadwrn.
Mae’r rhanbarth o Gymru bellach wedi ennill pedair allan o bedair yng ngrŵp 2 gyda phedwar pwynt bonws hefyd.
Rhoddodd y Gweilch gweir i’r Ffrancwyr oddi cartref nos Wener diwethaf ac er i Gilles Bosch gicio’r ymwelwyr ar y blaen wedi pedwar munud, stori debyg oedd hi eto yn Abertawe.
Daeth cais cyntaf y Gweilch i Olly Cracknell hanner ffordd trwy’r hanner cyntaf cyn i Ashley Beck ychwanegu’r ail ddeg munud yn ddiweddarach.
Roedd y pwynt bonws yn ddiogel i’r Cymry cyn hanner amser diolch i ddau gais yn neg munud olaf yr hanner cyntaf gan y bachwr rhyngwladol, Scott Baldwin.
Dechreuodd y Gweilch yr ail hanner ar dân hefyd gyda Dan Evans, a oedd yn chwarae ar yr asgell am newid, yn croesi am bumed cais ei dîm eiliadau wedi’r ail ddechrau.
Roedd Grenoble ar chwâl wrth i Brendon Leonard groesi am chweched y tîm cartref funud yn ddiweddarach.
Ychwanegodd Dan Biggar y seithfed cyn i’r eilyddion ymuno yn yr hwyl. Roedd cais yr un i Hanno Dirksen a Scott Otten cyn i Evans sgorio’i ail ef a degfed ei dîm bum munud o ddiwedd yr wyth deg!
Roedd digon o amser ar ôl i Driksen ychwanegu ei ail ef hefyd wrth i’r Gweilch wneud ffyliaid llwyr o Grenoble druan.
Gorffennodd Biggar y gêm gydag un pwynt ar hugain, wyth trosiad yn ogystal â’i gais.
Mae’r canlyniad yn rhoi’r Gweilch ym mhell ar y blaen ar frig grŵp 2 ac yn sicr o’u lle yn wyth olaf y gystadleuaeth.
.
Gweilch
Ceisiau: Olly Cracknell 19’, Ashley Beck 30’, Scott Baldwin 34’, 38’, Dan Evans 41’, 75’, Brendon Leonard 42’, Dan Biggar 56’, Hanno Dirksen 66’ 78’, Scott Otten 72’
Trosiadau: Dan Biggar 19’, 30’, 34’, 40’, 42’, 56’, 72’, 75’
.
Grenoble
Ciciau Cosb: Gilles Bosch 4’
Cerdyn Melyn: Mathies Marie 33’
