Leigh Halfpenny yn ennill ei ganfed cap dros Gymru

Mae’r chwaraewr rheng ôl Jac Morgan wedi’i enwi’n gapten ar dîm rygbi Cymru i herio Lloegr yng Nghaerdydd ddydd Sadwrn (Awst 5).

Ond does dim sicrwydd ar hyn o bryd mai fe fydd yn arwain y tîm yng Nghwpan y Byd, wrth i’r prif hyfforddwr Warren Gatland ystyried yr holl ymgeiswyr yn eu tro.

Bydd y cefnwr Leigh Halfpenny yn ennill ei ganfed cap yn y gêm baratoadol ar gyfer Cwpan y Byd, y nawfed chwaraewr i gyrraedd y garreg filltir honno ar ôl Alun Wyn Jones, Gethin Jenkins, George North, Dan Biggar, Stephen Jones, Gareth Thomas, Martyn Williams a Taulupe Faletau.

Mae tri enw newydd yn nhîm Gatland, sef y ddau brop Corey Domachowski a Kieran Assiratti, a’r canolwr Max Llewellyn.

Mae dau enw newydd ar y fainc hefyd, sef Taine Plumtree a Henry Thomas.

Daw Aaron Wainwright i mewn i safle’r wythwr wrth i Taulupe Faletau barhau i wella o anaf i’w goes, tra bydd Sam Costelow yn dechrau yn safle’r maswr a Gareth Davies yn fewnwr.

Fe fu tipyn o drafod am sefyllfa’r capten, wrth i Ken Owens frwydro i chwarae rhyw ran yng Nghwpan y Byd pe bai Cymru’n cymhwyso o’u grŵp, gyda’r bachwr wedi anafu ei gefn.

Fydd Alun Wyn Jones, Justin Tipuric na Rhys Webb ddim ar gael i Gymru ar ôl ymddeol.

Ar ôl bod yn ymarfer yn Nhwrci a’r Swistir, mae gan Gymru dair gêm baratoadol – dwy yn erbyn Lloegr ac un yn erbyn De Affrica – cyn i’r garfan gael ei chyhoeddi a chyn i’r twrnament ddechrau yn Ffrainc.

Bydd Cymru’n herio Ffiji ar Fedi 10, gyda Phortiwgal, Awstralia a Georgia yn cwblhau’r grŵp.

Tîm Cymru

Leigh Halfpenny; Louis Rees-Zammit, George North, Max Llewellyn, Rio Dyer; Sam Costelow, Gareth Davies; Corey Domachowski, Ryan Elias, Keiron Assiratti, Dafydd Jenkins, Will Rowlands, Christ Tshiunza, Jac Morgan (capten), Aaron Wainwright.