Leigh Halfpenny
Mae cefnwr Cymru Leigh Halfpenny yn dweud y bydd y tîm yn defnyddio’r boen o golli i Loegr llynedd er mwyn sicrhau buddugoliaeth nos fory yn Stadiwm y Mileniwm.
Flwyddyn yn ôl fe gollodd Cymru o 29-18 yn erbyn Lloegr yn Twickenham, a nos Wener fe fydd y ddau yn wynebu ei gilydd unwaith yn rhagor, yng ngêm agoriadol y Chwe Gwlad.
Roedd y boen y llynedd yn un dwbl i Halfpenny, gafodd ei gario o’r maes yn hwyr yn y gêm ar ôl datgymalu ei ysgwydd.
Ac mae’r cefnwr yn benderfynol o wneud yn iawn am hynny yn Stadiwm y Mileniwm fory.
“Roedden ni’n siomedig llynedd i fynd yno a pheidio â pherfformio cystal ag y gallwn ni fod wedi,” meddai Halfpenny.
“Mae’n rhywbeth sydd wedi aros gyda ni ers hynny. Fe fyddwn ni’n defnyddio’r boen yna i’w lawn effaith.”
Annog y dorf
Mae gan Loegr eu bwganod eu hunain ynglŷn â’r gêm hon hefyd, fodd bynnag – y tro diwethaf iddyn nhw ymweld â Chaerdydd ddwy flynedd yn ôl fe gawson nhw grasfa o 30-3.
Mynnodd Halfpenny fod tîm Lloegr yn un digon cryf i roi her galed tu hwnt iddyn nhw, er gwaethaf anafiadau i nifer o brif chwaraewyr yr ymwelwyr.
Ond does dim amheuaeth y bydd y dorf gartref yn hwb fawr unwaith eto, fel yr oedd e yn 2013 pan lwyddodd Cymru i gipio’r bencampwriaeth.
“I mi, y teimlad yna o redeg allan yn Stadiwm y Mileniwm yw’r un gorau allwch chi ei gael,” meddai Halfpenny.
