Scarlets 26–13 Dreigiau Casnewydd Gwent

Roedd hi’n bell o fod yn glasur wrth i’r Dreigiau ymweld â Pharc y Scarlets yn y Guinness Pro12 brynhawn Sul ond gwnaeth y tîm cartref ddigon i ennill y gêm yn gymharol gyfforddus.

Sgoriodd Bois y Sosban ddau gais, y naill i Gareth Owen yn yr hanner cyntaf a’r llall i Kristian Phillips wedi’r egwyl, ac roedd hynny ynghyd â chicio cywir Rhys Priestland yn ddigon i sicrhau buddugoliaeth.

Hanner cyntaf

Y Dreigiau a sgoriodd bwyntiau cyntaf y gêm wedi deg munud gyda chic gosb Jason Tovey yn dilyn sgrym gref.

Roedd y Scarlets yn gyfartal serch hynny dri munud yn ddiweddarach diolch i dri phwynt o droed Rhys Priestland, ac aethant ar y blaen gydag ail gynnig Priestland wedi chwarter awr.

Roedd y tîm cartref ddeg pwynt ar y blaen erbyn hanner ffordd trwy’r hanner wedi i Gareth Owen groesi am y cais agoriadol. Bylchodd Scott Williams i dorri’r llinell fantais ac roedd ei gyd ganolwr, Owen, wrth law i groesi o dan y pyst, 13-3 wedi trosiad syml Priestland.

Digon cyfartal oedd yr ail chwarter ond ni lwyddodd y naill dîm na’r llall greu unrhyw argraff ar y sgôr-fwrdd.

Ail Hanner

Chwaraewyd y gêm yn hanner y Dreigiau yn chwarter awr agoriadol yr ail hanner ond daliodd amddiffyn yr ymwelwyr yn gryf a bu rhaid i’r Scarlets fodloni ar dri phwynt o droed Priestland yn unig i’w ddangos am eu hymdrechion.

Caeodd Tovey’r bwlch gyda chic gosb toc wedi’r awr ond aeth y gêm o afael yr ymwelwyr ychydig funudau’n ddiweddarach pan sgoriodd y Scarlets gais o unman. Dangosodd Kristian Phillps sgiliau pêl droed da i gyrraedd y llinell gais wedi i’r Dreigiau golli’r bêl ar y llinell hanner, 23-6 wedi trosiad Priestland.

Rhoddodd cais yr eilydd, Rhichie Rees, lygedyn o obaith i’r Dreigiau wedi hynny ond y Scarlets a gafodd y gair olaf gyda thri phwynt o droed Steven Shingler yn y munudau olaf, 26-13 y sgôr terfynol.

Mae’r fuddugoliaeth yn codi’r Scarlets i’r pumed safle yn nhabl y Pro12, tra mae’r Dreigiau yn aros yn wythfed.

.

Scarlets

Ceisiau: Gareth Owen 17’, Kristian Phillips 65’

Trosiadau: Rhys Priestland 19’, 67’

Ciciau Cosb: Rhys Priestland 13’, 15’, 55’, Steven Shingler 78’

.

Dreigiau

Cais: Richie Rees 72’

Trosiad: Angus O’Brien 73’

Ciciau Cosb: Jason Tovey 10’, 64’