Dreigiau Casnewydd Gwent 14–18 Munster
Y maswr, Ian Keatley, sgoriodd bwyntiau Munster i gyd wrth i’r Gwyddelod drechu’r Dreigiau yn y RaboDirect Pro12 ar Rodney Parade nos Wener.
Roedd pethau’n edrych yn addawol i’r tîm cartref pan roddodd gôl adlam Jason Tovey hwy ar y blaen ddeg munud o’r diwedd, ond tarodd Munster a Keatley yn ôl gyda dwy gic gosb i ennill y gêm yn y munudau olaf.
Cyfartal oedd hi wrth i hanner amser agosáu wedi i Tovey a Keatley gyfnewid un gic gosb yr un yn y deugain munud agoriadol, ond aeth y Cymry i mewn ar yr egwyl gyda mantais fain gan i Tovey ychwanegu tri phwynt arall gyda chic olaf yr hanner.
Daeth unig gais y gêm yn gynnar yn yr ail hanner pan ledwyd y bêl yn gyflym o’r chwith i’r dde i greu cais yn y gornel i’r asgellwr, Matthew Pewtner.
Wyth pwynt o fantais i’r Dreigiau felly ar ddechrau’r ail hanner ond crafodd Munster ar y blaen gyda thair cic gosb o droed Keatley cyn i gôl adlam Tovey roi’r Dreigiau yn ôl ar y blaen ddeg munud o’r diwedd.
Ond methodd y tîm cartref ddal eu gafael a chawsant eu cosbi am eu diffyg disgyblaeth wrth i Keatley ennill y gêm i’w dîm gyda’i bumed a’i chweched gic gosb lwyddiannus yn y munudau olaf.
Nid yw’r canlyniad yn newid llawer yn nhabl y Pro12, gyda’r Dreigiau yn aros yn seithfed a Munster yn parhau ar y brig.
.
Dreigiau
Cais: Matthew Pewtner 43’
Ciciau Cosb: Jason Tovey 11’, 40’
Gôl Adlam: Jason Tovey 70’
Cerdyn Melyn: Cory Hill 62’
.
Munster
Ciciau Cosb: Ian Keatley 25’, 52’, 61’, 67’, 73, 76’
Cerdyn Melyn: Keith Earls 56’
