Y Gweilch yn arwyddo Aisea Natoga

Mae’r Gweilch wedi arwyddo olwr amryddawn Ffiji, Aisea Natoga.

Mae’r chwaraewr 22 oed, sy’n gallu chwarae yn safle’r canolwr, cefnwr neu asgellwr, wedi cynrychioli ei wlad ar lefel dan 18 a dan 20, yn ogystal â’r tîm saith bob ochr llawn.

Eisoes, mae e wedi ennill pum cap llawn dros ei wlad.

Gwnaeth Natoga osod ei stamp ar Gwpan Gwledydd y Cefnfor Tawel yn ddiweddar, wrth i’w wlad ennill y gystadleuaeth.

Fe fydd rhaid iddo aros am fisa cyn y caiff arwyddo’r cytundeb gyda’r Gweilch.

‘Cyffrous’

Dywedodd Rheolwr Gweithrediadau’r Gweilch, Andy Lloyd: “Rydyn ni wedi bod yn dilyn Aisea ers cryn amser felly rydyn ni’n falch o fod wedi sicrhau ei wasanaeth i’r Gweilch.

“Mae nifer o chwaraewyr o Ffiji wedi gwneud cryn argraff ar rygbi yn Ewrop yn ystod y tymhorau diwethaf.

“Mae’n gweddu i’r hyn rydyn ni’n trio ei wneud yma fel tîm sy’n dal yn awyddus i gystadlu ym mhopeth.

“Mae’n ychwanegu rhywbeth at ein llinell ôl ac yn rhoi dyfnder i ni mewn safleoedd allweddol nad oedd gennym y tymor diwethaf.

“Rydyn ni wir yn gyffrous am yr effaith a allai ei chael yng nghrys y Gweilch.”