Bydd y prop Gethin Jenkins yn colli’r gêm yn erbyn y Queensland Reds yfory yn dilyn anaf i’w goes wrth ymarfer.

Prop y Saraseniaid a Lloegr, Mako Vunipola fydd yn cymryd ei le yn y tîm, ac fe fydd prop Caerlŷr, Dan Cole ar y fainc.  Oherwydd yr anafiadau i Jenkins a’r Gwyddel Cian Healy fe fydd prop yr Alban, Ryan Grant, yn gadael taith ei wlad yn Ne Affrig ac yn hedfan o Durban i Brisbane i ymuno â’r Llewod.  Fe fydd y Gwyddel Cian Healy yn dychwelyd adref ddydd Sul oherwydd anaf.

‘‘Mae Gethin wedi ymarfer yn dda ond gan ei fod wedi teimlo tyndra yn ei goes fe wnaethom ni benderfynu byddai’n well iddo beidio a chwarae,” meddai Warren Gatland, Prif Hyfforddwr y Llewod.