Abertawe 1–1 Man U

Daeth blwyddyn wych Abertawe ar y Liberty i ben gyda chanlyniad cartref cofiadwy arall brynhawn Sul. Y tîm ar frig yr Uwch Gynghrair, Man U oedd yr ymwelwyr ond sicrhaodd tîm Michael Laudrup bwynt da.

Rhoddodd Patrice Evra yr ymwelwyr ar y blaen cyn i Miguel Michu unioni i’r Cymry cyn yr egwyl.

Dechreuodd yr ymwelwyr yn dda ac roedd awgrym fod Ben Davies wedi llawio yn y cwrt cosbi wedi dim ond dau funud ond dim cic o’r smotyn medd y dyfarnwr.

Trodd y pwysau yn gôl agoriadol wedi chwarter awr pan rwydodd Evra. Crymanodd Robin Van Persie gic gornel at y postyn agosaf a pheniodd Evra i’r postyn pellaf i roi Man U ar y blaen.

Ond er gwaethaf dechrau da y tîm ar y brig, dim ond un tîm oedd ynddi wedi hynny tan ddiwedd yr hanner a daeth hi’n fwyfwy amlwg fod yr Elyrch yn chwarae yn erbyn un o amddiffynfeydd gwaethaf y gynghrair.

Fe rwydodd Jonathan de Guzman wedi deunaw munud ond roedd y dyfarnwr wedi gweld Michu yn rhwystro Jonny Evans.

Daeth gôl i’r tîm cartref o’r diwedd wedi hanner awr a phwy oedd y sgoriwr? Pwy arall ond Michu. Cafwyd cyd chwarae da rhwng Nathan Dyer, Wayne Routledge a De Guzman,  ac er i David De Gea arbed cynnig De Guzman fe roddodd hi’n syth i lwybr ei gyd wladwr a gwnaeth yntau’r gweddill.

Cyfartal ar yr egwyl felly a dechreuodd Abertawe yr ail hanner yn dda hefyd gan gynhesu dwylo De Gea. Gwnaeth y gôl-geidwad yn dda i arbed ergyd Kemy Agustein o bellter a chynnig Routledge ym munudau cyntaf yr ail gyfnod.

Roedd Man U yn well wedi hynny a daeth Van Persie yn hynod agos gyda foli feiddgar hanner ffordd trwy’r hanner.

Roedd gôl yr Elyrch dan warchae yn y chwarter awr olaf ond gwyrodd Michele Vorm beniad Michael Carrick yn erbyn y postyn a llwyddodd yr amddiffynwyr rywsut i atal cynnigion Van Persie ac Ashley Young hefyd.

Daliodd Abertawe eu gafael i hawlio pwynt haeddianol ac maent yn aros yn unfed ar ddeg yn nhabl yr Uwch Gynghrair yn dilyn y gêm gyfartal.

.

Abertawe

Tîm: Vorm, Chico, Williams, Tiendalli, Davies, Britton (Ki Sung-Yeung, Michu, Dyer, Routledge, De Guzman (Moore 70’), Agustien (Shechter 87’)

Gôl: Michu 29’

Cardiau Melyn: Chico 59’, Williams 76’

.

Man U

Tîm: De Gea, Evra, Jones, Evans, Vidic, Valencia (Hernandez 61’), Carrick, Young, Cleverley (Scholes 85’), Rooney (Giggs 78’), Van Persie

Gôl: Evra 16’

Cardiau Melyn: Jones 27’, Rooney 69’, Van Persie 77’, Scholes 90’

.

Torf: 20,650