Caerdydd 2–1 Hull
Mae record gartref gant y cant Caerdydd yn parhau yn dilyn buddugoliaeth dros Hull yn Stadiwm y Ddinas brynhawn Sadwrn.
Roedd goliau Heidar Helguson a Mark Hudson yn ddigon i sicrhau wythfed buddugoliaeth gartref o’r bron i dîm Malky Mackay.
Dim ond tri munud oedd ar y cloc pan beniodd Helguson groesiad Craig Noone heibio i’r dyn rhwng y pyst i Hull, Ben Amos.
Bu bron i Hudson ddyblu mantais y tîm cartref ond tarodd ei beniad yn erbyn y trawst. A gorffennodd Hull yr hanner yn gryf gyda Robert Koren yn dod yn agos.
Daeth y ddau dîm yn agos gyda chiciau rhydd yn yr ail hanner. Tarodd ymdrech Sone Aluko o bump llath ar hugain yn erbyn trawst gôl David Marshall, ac yn y pen arall fe wnaeth Amos yn dda i arbed cynnig Peter Wittingham.
Yna, gyda saith munud ar ôl, fe seliodd Hudson y fuddugoliaeth gyda pheniad da o groesiad Aron Gunnarsson.
Ceisiodd Wittingham ei lwc o bellter gyda chic rydd arall yn y munudau olaf cyn i Koren rwydo gôl gysur hwyr i’r ymwelwyr gyda chwip o foli.
Aros yn y trydydd safle yn nhabl y Bencampwriaeth y mae Caerdydd er gwaethaf y tri phwynt oherwydd buddugoliaethau Crystal Palace a Middlesbrough dros y penwythnos.
.
Caerdydd
Tîm: Marshall, McNaughton (Kiss 19’ [Ralls 46’]), Taylor, Hudson, Turner, Whittingham, Kim Bo-Kyung, Noone, Gunnarsson, Mason, Helguson (Gestede 66’)
Goliau: Helguson 3’, Hudson 83’
Cardiau Melyn: Kim Bo-Kyung 60’, Turner 71’
Hull
Tîm: Amos, Rosenior, Chester, McShane (Brady 56’), Faye, Elmohamady, Evans, Koren, Quinn (Mclean 75’), Simpson (Meyler 56’), Aluko
Gôl: Koren 90’
Torf: 20,058
