Bale yn gobeithio am wyrth yn White Hart Lane

Gareth Bale
Dywed Gareth Bale ei fod yn dal i obeithio gweld Tottenham yn cyrraedd rownd gyn-derfynol Cynghrair y Pencampwyr – er iddyn nhw golli 4-0 yn erbyn Real Madrid yn y cymal cyntaf. 

 Er gwaethaf yr her sy’n wynebu tîm Harry Redknapp, mae asgellwr Cymru wedi galw am optimistiaeth o flaen yr ail gymal yn White Hart Lane. 

 “Mae unrhyw beth yn gallu digwydd mewn pêl droed.  Mae ‘na sawl gêm anhygoel wedi bod yn y gorffennol,” meddai Gareth Bale. 

 “Ry’n ni’n mynd i ymdrechu a pheidio rhoi’r gorau iddi.  Mae’n mynd i fod yn her sydd bron yn amhosib, ond ry’n ni’n mynd i weld beth sy’n digwydd.

 “Rwy’n gobeithio gallwn ni gynhyrchu gwyrth.  Mae’n rhaid i ni fod yn fwy optimistaidd.  Fe fyddwn ni’n mynd allan am y fuddugoliaeth o’r eiliad gyntaf.”

Mae Gareth Bale wedi dweud unwaith eto ei fod yn hapus i aros gyda Tottenham ar ôl cael ei gysylltu gyda nifer o brif glybiau Ewrop, gan gynnwys Real Madrid. 

“Rwy’n hapus gyda Tottenham.  Mae’n dîm ifanc ac rwy’n hapus yma.  Rwyf wedi datblygu llawer dros y flwyddyn ddiwethaf, ond mae ’na fwy i ddod.”