Pwynt i’r Elyrch yn erbyn Everton

Everton 1–1 Abertawe        
                                                             

Disgynodd Abertawe i waelod yr Uwch Gynghrair gyda gêm gyfartal yn erbyn Everton ar Barc Goodison brynhawn Sadwrn.

Rhoddodd Gylfi Sigurdsson yr Elyrch ar y blaen o’r smotyn ychydig funudau cyn yr egwyl ond cipiodd Everton bwynt gyda pheniad hwyr Seamus Coleman.

Wedi deugain munud di sgôr fe gafodd Sigurdsson ei lorio yn y cwrt cosbi gan Phil Jagielka. Cododd y gŵr o Wlad yr Iâ ar ei draed cyn curo Maarten Steklenburg o’r smotyn.

Felly yr arhosodd hi tan hanner amser, ac yn wir, felly yr arhosodd hi tan ddau funud o ddiwedd y naw deg pan beniodd Coleman y bêl dros ben Lukasz Fabianski i gipio pwynt i’w dîm.

Mae gêm gyfartal yn Goodison yn ganlyniad digon parchus i dîm Bob Bradley ond nid yw’n ddigon i’w hatal rhag disgyn i waelod tabl yr Uwch Gynghrair gan i Sunderland ennill gartref yn erbyn Hull.

.

Everton

Tîm: Stekelenburg, Coleman, Jagielka (Valencia 83’), Williams, Baines, Gueye, McCarthy (Mirallas 72’), Lennon (Deulofeu 66’), Barkley, Bolasie, Lukaku

Gôl: Coleman 89’

Cardiau Melyn: Jagielka 40’, McCarthy 57’, Baines 63’, Barkley 75’, Mirallas 90’

.

Abertawe

Tîm: Fabianski, Naughton, Fernandez, Amat, Taylor, Fulton (Ki Sung-yueng 87’), Cork, Fer, Barrow (Dyer 81’), Sigurdsson, Routledge

Gôl: Sigurdsson [c.o.s.] 41’

Cardiau Melyn: Barrow 38’, Naughton 42’

.

Torf: 38,773