Southampton 1–0 Abertawe 
Mae dechrau siomedig Abertawe i’r tymor yn parhau wedi iddynt golli oddi cartref yn erbyn Southampton yn St Mary’s brynhawn Sul.
Charlie Austin a sgoriodd unig gôl y gêm i’r tîm cartref toc wedi’r awr a methodd yr Elyrch a bygwth llawer yn y pen arall.
Southampton a oedd y tîm gorau yn yr hanner cyntaf ond roedd eu hymosodwyr yn wastraffus o flaen gôl. Nathan Redmond a gafodd y cyfle gorau ond anelodd yn uchel dros y trawst o ddeuddeg llath.
Daeth Austin ymlaen fel eilydd yn yr ail hanner ac roedd y tîm cartref yn edrych yn dipyn mwy tebygol o sgorio wedi hynny.
Bu bron iddo roi ei dîm ar y blaen pan darodd y trawst o groesiad Redmond ond daeth o hyd i gefn y rhwyd toc wedi’r awr. Rheolodd groesiad Dusan Tadic ar ei frest cyn anelu ergyd gadarn i do’r rhwyd.
Roedd Abertawe fymryn yn well wedi hynny gyda Jefferson Montero yn creu argraff ar ôl dod i’r cae fel eilydd. Gylfi Sigurdsson a ddaeth agosaf i’r ymwelwyr ond doedd dim gôl i fod wrth iddynt lithro i’r pymthegfed safle yn nhabl yr Uwch Gynghrair.
.
Southampton
Tîm: Forster, Soares, Fonte, van Dijk, Bertrand, Romeu, Claise (Højbjerg 54’), Davis, Tadic (Martina 81’), Redmond, Long (Austin 54’)
Gôl: Austin 64’
Cerdyn Melyn: Long 41’
.
Abertawe
Tîm: Fabianski, Naughton, Fernandez, Amat, Kingsley (Rangel 45’), Ki Sung-yueng (Montero 66’)m Cork (González Tomás 82’), Fer, Barrow, Llorente, Sigurdsson
Cerdyn Melyn: Naughton 89’
.
Torf: 29,087
