Mae amheuon fod Neco Williams wedi torri ei ên, ar ôl taro yn erbyn ei gyd-chwaraewr a chyd-Gymro Brennan Johnson neithiwr (nos Fercher, Ebrill 26).
Roedd Nottingham Forest yn chwarae yn erbyn Brighton, wrth iddyn nhw godi allan o safleoedd y gwymp gyda buddugoliaeth o 3-1.
Ond roedd cysgod dros y gêm ar ôl i Williams gael ei gludo oddi ar y cae ar wastad ei gefn ar ôl taro’i ben yn erbyn Johnson.
Rhuthrodd staff meddygol i’r cae ar unwaith i roi triniaeth hir iddo ar ôl 63 munud o’r gêm.
Ar ôl gadael y cae, daeth y newyddion ei fod e’n cael ei drin am gyfergyd.
“Fe wnes i edrych pan ddaeth e oddi ar y cae, ac fe welais i waed,” meddai Steve Cooper, rheolwr Nottingham Forest.
“Felly croesi bysedd nad yw’n rhy ddrwg.
“Ei iechyd sy’n dod gyntaf, waeth beth yw’r canlyniad.”
