Mae tîm pêl-droed Wrecsam bellach yn gwybod eu bod nhw yng ngemau ail gyfle’r Gynghrair Genedlaethol, wrth iddyn nhw geisio dychwelyd i’r Gynghrair Bêl-droed am y tro cyntaf ers 14 o flynyddoedd.
Roedd angen iddyn nhw guro Dagenham & Redbridge a gobeithio bod Halifax yn curo Stockport er mwyn iddyn nhw gael eu dyrchafu’n bencampwyr.
Ond colli oddi cartref o 3-0 oedd hanes tîm Phil Parkinson, tra bod Stockport wedi ennill gartref o 2-0.
Mae hynny’n golygu bod Wrecsam yn gorffen yn ail.
Dyma sut mae’r gemau ail gyfle’n gweithio:
Mae Stockport wedi’u dyrchafu’n bencampwyr, felly does dim angen iddyn nhw boeni beth ddaw nesaf.
Y dilëyddion (eliminators) sydd gyntaf, gyda’r enillwyr yn ennill yr hawl i deithio i herio’r timau wnaeth orffen yn safleoedd uchaf wedyn.
Ar Fai 23, bydd y tîm wnaeth orffen yn bumed (Notts County) yn croesawu’r tîm yn y chweched safle (Grimsby) yng ngêm Dilëydd A.
Ar Fai 24, y tîm orffennodd yn bedwerydd (Halifax) fydd yn croesawu’r tîm yn y seithfed safle (Chesterfield) yng ngêm Dilëydd B.
Bydd y ddwy gêm yn cychwyn am 7.45yh.
O ran y gemau cyn-derfynol, bydd y rheiny yn cael eu cynnal ar Fai 28 a 29.
Ar Fai 28, bydd y tîm wnaeth orffen yn ail (Wrecsam) yn herio enillydd Dilëydd A (Notts County neu Grimsby).
Ar Fai 29, bydd y tîm wnaeth orffen yn drydydd (Solihull Moors) yn herio enillydd Dliëydd B (Halifax neu Chesterfield).
Bydd enillwyr y ddwy gêm gyn-derfynol yn herio’i gilydd yn y rownd derfynol ar Fehefin 5.
Ond cyn hynny, ymhen wythnos (dydd Sul, Mai 22), bydd Wrecsam yn herio Bromley mewn cystadleuaeth arall, Tlws yr FA, yn Wembley.
Mae digon o gyffro i ddod cyn diwedd y tymor!
