Neil Taylor
Mae Crystal Palace ymysg y clybiau sydd eisiau arwyddo cefnwr chwith Abertawe a Chymru Neil Taylor, yn ôl adroddiadau.
Fe gynigiodd y clwb o Lundain £3m am y cefnwr yr wythnos hon, yn ôl BBC Sport, er mwyn ceisio ei ddenu o Stadiwm Liberty.
Ond nid yw hynny yn debygol o fod yn ddigon i berswadio Abertawe i’w werthu, gan fod Taylor bellach yn ddewis cyntaf yn y tîm.
Arian i Wrecsam?
Fe ddangosodd Fulham a West Ham ddiddordeb yn y cefnwr y llynedd, gydag adroddiadau bod Fulham wedi cynnig £5m amdano ym mis Ionawr 2014.
Bryd hynny roedd Taylor yn ail ddewis fel cefnwr chwith y tu ôl i Ben Davies. Ond ers i Davies symud i Spurs dros yr haf mae Taylor wedi adennill ei le yn y tîm.
Symudodd y cefnwr i Abertawe o Wrecsam yn 2010 am £500,000, ac fel rhan o’r cytundeb hwnnw fe fyddai Wrecsam yn derbyn 10-15% o unrhyw ffi petai Abertawe yn gwerthu Taylor i glwb arall.
