Y Seintiau Newydd 1–1 Airbus

Cyfartal oedd hi ar Neuadd y Parc brynhawn Sul wrth i Airbus ymweld â’r pencampwyr yn Uwch Gynghrair Cymru.

Rhoddodd Mike Wilde y Seintiau Newydd ar y blaen yn gynnar cyn i Glenn Rule unioni pethau i’r ymwelwyr cyn yr egwyl.

Hanner Cyntaf

Daeth cyfle cyntaf y gêm i Airbus ond aeth cynnig tin-dros-ben Ryan Wade yn syth at Paul Harrison am arbediad hawdd.

Deuddeg munud yn unig fu rhaid aros am y gôl agoriadol wrth i’r tîm cartref fynd ar y blaen pan beniodd Wilde gic gornel Chris Marriott yn syth i gefn y rhwyd.

Cafodd y Seintiau sawl cyfle da i ddyblu’r fantais wedi hynny. Llwyddodd James Coates yn y gôl i arbed dau gynnig gan Alex Darlington, un peniad gwan ac un ergyd yn dilyn gwaith creu da Adrian Cieslewicz.

Daeth Aeorn Edwards yn agos i’r tîm cartref hefyd gydag ergyd nerthol o ochr y cwrt cosbi.

Ond er gwaethaf y cyfleoedd hynny i’r Seintiau, Airbus oedd tîm gorau’r hanner cyntaf ar y cyfan ac roeddynt yn llawn haeddu dod yn ôl i’r gêm cyn yr egwyl.

Methodd Wade gyfle da pan anelodd foli dros y trawst o chwe llath ddau funud o ddiwedd yr hanner, ond llwyddodd i greu gôl wych i Glenn Rule yn fuan wedyn.

Gwnaeth Wade yn dda i guro’i ddyn ar ochr chwith y cwrt cyn chwarae’r bêl i Rule a llwyddodd yntau i droi’i ddyn gyda’i gyffyrddiad cyntaf cyn anelu taran o ergyd i gefn y rhwyd gyda’i ail. Gôl wych ac Airbus yn ôl yn y gêm.

Ail Hanner

Dechreuodd Airbus yr ail hanner ar dân hefyd a gwastraffodd Chris Budrys gyfle dwbl da wrth i’r Seintiau fethu â  chlirio’r bêl o’r cwrt chwech.

Gorffennodd y Seintiau’r gêm fymryn yn gryfach ac roedd Airbus yn ddyledus i Coates yn y gôl wrth iddynt gadw gafael ar gêm gyfartal.

Gwnaeth y golwr yn dda i atal Wilde, Chris Seargeant a Cieslewicz i gipio pwynt haeddianol i’w dîm.

Mae’r canlyniad yn cadw’r Seintiau ar frig yr Uwch Gynghrair ac yn codi Airbus dros Aberystwyth i’r trydydd safle.

.

Y Seintiau Newydd

Tîm: Harrison, Spender, Rawlinson, Marriott, A. Edwards, K. Edwards, Cieslewicz, Darlington (Seargeant 58’), Quigley (Mullan 58’), Wilde

Gôl: Wilde 12’

Cerdyn Melyn: Spender 65’

.

Airbus

Tîm: Coates, Owens, Pearson, Jones, Short, Williams (Barrow 80’), Rule, Owen, Healing, Wade (Eyre 80’), Budrys

Gôl: Rule 45’

Cerdyn Melyn: Wade 65’

.

Torf: 578