Southampton yn Curo Deg Dyn Abertawe

Doedd dim dwywaith mai’r tîm cartref a gafodd y dechrau gorau a bu bron i Wayne Routledge eu rhoi ar y blaen wedi ychydig llai na hanner awr yn dilyn gwaith creu da Gylfi Sigurdsson, ond tarodd ergyd Routledge yn erbyn y trawst.

Bu rhaid i Ryan Bertrand fod ar flaenau’i draed yn fuan wedyn i glirio peniad Bony oddi ar y llinell, ond hwnnw oedd un o gyfraniadau olaf y blaenwr o’r Traeth Ifori wrth iddo gael ei anfon oddi ar y cae yn fuan wedyn.

Roedd Bony eisoes wedi derbyn cerdyn melyn am un dacl flêr ar Mayo Yoshida pan loriodd y gŵr o Siapan am yr eildro, derbyn ail gerdyn melyn a cherdyn coch bum munud cyn yr egwyl.

Cynyddodd Southampton y pwysau’n raddol ar y deg dyn wrth i’r ail hanner fynd yn ei flaen ac roeddynt yn haeddu mynd ar y blaen pan wnaethant hynny ddeg munud o’r diwedd.

Daeth Graziano Pellè o hyd i Wanyama yn y cwrt cosbi a defnyddiodd yntau ei gryfder i guro’i ddyn cyn tanio ergyd nerthol i gefn y rhwyd.

Cafodd Abertawe hi’n anodd ymateb gydag un dyn yn llai ac fe ddaliodd Southampton eu gafael ar y tri phwynt.

Mae Southampton yn neidio dros yr Elyrch i’r ail safle yn y tabl, wrth i dîm Garry Monk lithro i’r pumed safle.