Phil Neville wedi dod dan y lach
Mae’r BBC wedi amddiffyn eu dewis o sylwebwyr ar gyfer Cwpan y Byd yn dilyn cwynion gan y cyhoedd ynglŷn â rhai ohonyn nhw.
Dywedodd y BBC bod angen i wylwyr “gymryd amser” i ddod i arfer a rhai o’r sylwebwyr.
Phil Neville, cyn chwaraewr gyda Manchester United ac Everton, sydd wedi denu’r rhan helaeth o’r feirniadaeth, gyda’r BBC yn derbyn 442 o gwynion yn dilyn sylwebaeth Neville o gêm Lloegr yn erbyn Yr Eidal nos Sadwrn.
Honno oedd y gêm gyntaf i Neville sylwebu arni fel cyd-sylwebydd, ac ymhlith y rhesymau dros y cwynion oedd ei ddiffyg emosiwn ac arddull undonog.
Yn ogystal â Neville, mae gwylwyr hefyd wedi beirniadu sylwadau Jonathan Pearce yn ystod gêm Ffrainc a Honduras, a chyn-chwaraewr Brasil Juninho am ei fod yn anodd ei ddeall ar brydiau.
Mae’r cwynion o ddiffyg eglurdeb hefyd wedi eu targedu at Fabio Cannavaro, cyn-gapten Yr Eidal sydd yn sylwebu ar gyfer ITV.
‘Sylwebwyr cryf a phrofiadol’
Mewn ymateb i’r cwynion, mae’r BBC wedi dweud mewn datganiad eu bod yn hapus â’u sylwebwyr.
“Rydym yn credu ein bod wedi dewis sylwebwyr rhyngwladol cryf, profiadol sydd â gwybodaeth sy’n cwmpasu pob agwedd o’r gêm ar y lefel uchaf bosib.
“Mae ein holl gyfranwyr a sylwebwyr wedi’u penodi ar sail eu profiad, eu gwybodaeth a’u talent.
“Mae barn yn aml yn wrthrychol, fodd bynnag, ac ni fyddem yn disgwyl i bawb gytuno a phob dewis a wnawn, ac rydym yn gwerthfawrogi y gall gymryd amser i wylwyr a gwrandawyr ddod i arfer a steil unigolyn o sylwebu.”
Ar nodyn ysgafnach, mae gwerthwr gwresogyddion o’r enw Phil Neville o Suffolk wedi derbyn cwynion annisgwyl dros wefan Twitter dros y dyddiau diwethaf gan rai sydd wedi ei gamgymryd fel sylwebydd y BBC.
