Mae Abertawe wedi arwyddo chwaraewr canol-cae Real Betis, Alejandro Pozuelo.
Pozuelo yw’r seithfed Sbaenwr yn Stadiwm Liberty, ac fe fydd e’n ymuno â’i gyd-wladwyr sydd newydd ddod i Abertawe, Jose Canas a Jordi Amat.
Daeth cytundeb Pozuelo i ben ddiwedd y tymor, ac fe ddaeth i Gymru ar gytundeb tair blynedd.
Dydy’r Elyrch ddim wedi cyhoeddi pris y chwaraewr.
Chwaraeodd Pozuelo 11 o weithiau yn La Liga yn Sbaen y tymor diwethaf.
Dywedodd: “Rwy’n hapus iawn fy mod i wedi ymuno ag Abertawe.
“Ers i fi fod yn fachgen bach, fy mreuddwyd fu chwarae yn yr Uwch Gynghrair.
“O’r foment wnes i glywed am ddiddordeb Abertawe, rwy wedi gwylio’u gemau nhw ac wedi dilyn newyddion y clwb.
“Mae arddull y chwarae ac arddull y rheolwr yn fy siwtio i.”
Dau chwaraewr ifanc o Ewrop
Yn y cyfamser, mae’r Elyrch wedi cyhoeddi eu bod nhw wedi arwyddo dau chwaraewr ifanc o Ewrop – y golwr 17 oed o Slofenia, Gregor Zabret a’r chwaraewr canol-cae 19 oed, Alex Gogic.
Daw Zabret o glwb NK Domzale ar ôl gwneud ei ymddangosiad cyntaf yn Uwch Gynghrair Slofenia y tymor diwethaf, ac mae Gogic o glwb Olympiakos yng Ngroeg wedi cynrychioli tîm dan 19 Cyprus.
Mae amddiffynnwr canol Abertawe, Kyle Bartley, gafodd ei arwyddo o Arsenal, wedi symud i Birmingham ar fenthyg.
