Roedd dros ddwy fil o athletwyr yn Kona, Hawaii yn cymryd rhan yn Bencampwriaeth Ironman y Byd – ac yn eu plith yr oedd yn gŵr o Felinfach ger Llanbedr Pont Steffan.
Fe sicrhaodd Gareth Hodgson,30, ei le yn y bencampwriaeth trwy orffen yn y deg uchaf yn ei oedran yn Ironman Dinbych-y-pysgod ym mis Medi y llynedd.
“Fe ddechreues i ymarfer rhyw ddeng mlynedd yn ôl, seiclo a rhedeg gyda chlwb Sarn Helen yn Llanbed,” meddai wrth golwg360.
“Ro’n i’n mwynhau, ac mi wnes gymryd rhan yn Marathon Eryri yn 2014 ac roeddwn yn fodlon â fy amser o 3 awr 34 munud, felly roeddwn yn gwybod bod cennai obaith o gystadlu mewn digwyddiadau tebyg.
“Mi benderfynes anelu at gymryd rhan mewn Ironman mewn tair blynedd – roedd yn uchelgeisiol ond yn darged i mi. Y broblem yw bod anafiadau yn rhan o’r broses, ac maen nhw’n amharu ar yr ymarfer.”
Mae gan Gareth Hodgson deulu ifanc ac fel nifer yn gorfod cael y balans rhwng teulu ac ymarfer. I gystadlu mewn her mor galed ag Ironman y Byd, roedd angen ymarfer tua 20 awr yr wythnos.
“Roedd y gost o gystadlu yn y digwyddiad tua £700, ac fe aethon ni draw fel teulu, felly roedd hi’n dipyn o gost, ond yn drip bythgofiadwy,” meddai.
Cael ei daro’n wael
Ond roedd siom i ddod. Dridiau cyn y digwyddiad yn Hawaii, fe gafodd Gareth Hodgson ei daro’n wael… ond roedd yn benderfynol o ddechrau’r ras, heb wybod a allai ei chwblhau hi.
Ond fe lwyddodd.
“Roeddwn funudau i ffwrdd o fy nharged yn y nofio, tua hanner awr ar y beic a thri chwarter awr yn rhedeg, mi orffennais mewn 11 awr a 35 munud,” meddai.
“Roedd y rhedeg yn galed, ond mi wnes roi bob dim i mewn i orffen y ras.
“Roedd gen i darged i orffen o fewn deg awr, felly wnes i ddim yn rhy ffol.
“Rhyw ddiwrnod, fe a’ i yn ôl, yn sicr mae gen i fusnes anorffenedig. Roedd yn brofiad anhygoel ac roedd yr holl ddigwyddiad yn wych, yn llawn bwrlwm.”
Mae cyfweliad gyda Gareth Hodgson yn rhifyn yr wythnos yma o gylchgrawn Golwg hefyd.
