“Os taw dyma’r unig wobr enilla i fyth, dw i’n hapus taw hon yw hi”

Mae ennill gwobr BAFTA Cymru yn “gwbl, gwbl berffaith”, meddai’r actor a’r canwr Luke Evans wrth golwg360.

Derbyniodd yr actor, gafodd ei fagu yn Aberbargod, wobr am y rhaglen adloniant orau yn y gwobrau yng Nghasnewydd neithiwr (nos Sul, Hydref 15).

Cafodd Luke Evans: Showtime!, noson o ganu yng nghwmni sêr fel Olly Murs a Nicole Scherzinger, ei ffilmio yng Nghanolfan Gynadledda Ryngwladol Cymru, ac roedd hi’n addas iawn bod Luke Evans a chriw’r rhaglen yn ôl yno i dderbyn y wobr.

Dyma’r BAFTA cyntaf i Luke Evans, sydd wedi ymddangos mewn ffilmiau fel The Hobbit ac mewn sioeau ar yr West End, ei hennill.

“Dw i’n hapus ofnadwy i fod yma, dw i yn licio tuxedo felly mae hi wastad yn braf rhoi penguin suit ymlaen a dod allan a bod mewn ystafell yn llawn pobol drwsiadus – i gyd yn dalentog, i gyd yn llwyddo i wneud pethau anhygoel, a’r rhan fwyaf ohonyn nhw’n Gymraeg!

“Fysa pethau ddim yn gallu bod yn well!”

“Dyma’r tro cyntaf erioed i fi ennill BAFTA, ac mae ennill gwobr BAFTA Cymru yn gwbl, gwbl berffaith.

“Os taw dyma’r unig wobr enilla i fyth, dw i’n hapus taw hon yw hi.”

‘Cwbl, cwbl berffaith’

Pa gân fyddai criw Showtime! yn dewis ei chanu i ddathlu, felly?

“’Calon Lân’ fwy na thebyg!” meddai Emyr Afan, cyfarwyddwr y rhaglen, gan chwerthin.

“Fysa hynny’n addas, yn bysa,” ychwanega Luke Evans.