Bryn Fôn - artist diweddaraf gig '50'
Mae trefnwyr gig hanner canmlwyddiant Cymdeithas yr Iaith Gymraeg wedi cyhoeddi mai Bryn Fôn yw’r artist diweddaraf sy’n ymuno â’r amserlen.
Yn ogystal â hynny, mae tocynnau’r gig ar gael i’w prynu ers pnawn ddoe (1 Mawrth) am £25 – mae’r digwyddiad yn llwyfannu 50 o artistiaid dros ddeuddydd ar 13-14 Gorffennaf eleni.
Ers cyhoeddi trefniadau’r gig yr Eisteddfod Genedlaethol llynedd, mae’r Gymdeithas wedi bod yn enwi un artist newydd sy’n perfformio pob wythnos ers hynny.
Ymysg y 30 sydd wedi eu henwi hyd yn hyn mae Gruff Rhys, Yr Ods, Meic Stevens a Gai Toms ymysg.
Cyd ddathlu
Mae Bryn Fôn yn credu bydd y digwyddiad, a gynhelir yn y Pafiliwn ym Mhontrhydfendigaid, yn un cofiadwy iddo am sawl rheswm.
“Fel un sydd wedi bod mewn band ers dros 35 o flynyddoedd, dwi’n teimlo fel cyd ddathlu hefo’r Gymdeithas … mae’n teimlo fel 50 i mi ’fyd!” meddai Bryn Fôn.
“Rwyf wedi bod yn dyst i sawl ‘noson fawr ‘ yn y gorffennol, ond mae’n debyg y bydd y gig i ddathlu’r 50 yn uchafbwynt i unrhyw un sydd â diddordeb mewn canu Cymraeg.”
Mae gan Bryn Fôn gysylltiadau ac atgofion arbennig o ardal Pontrhydfendigaid hefyd.
“Wrth gwrs, bydd hefyd yn grêt cael mynd nôl i’r Bont i weld hen ffrindiau o fy nyddiau yn chwarae pêl-droed i’r pentre’.”
Mae tocynnau’r penwythnos bellach ar werth ar wefan y digwyddiad.
Mae’r trefnwyr yn cyhoeddi enw un perfformiwr newydd pob wythnos ar y cyfrif Twitter @hannercant.
