Bardd o Gymru mewn gŵyl yn Efrog Newydd

Gillian Clarke
Mae Bardd Cenedlaethol Cymru, Gillian Clarke, yn perfformio yng ngŵyl Lleisiau’r Byd (PEN) yn Efrog Newydd yr wythnos hon.

Clarke yw’r awdur cyntaf o Gymru i’w gwahodd i annerch yn y digwyddiad hwn, sy’n para dros wythnos, ac yn cael ei ystyried yn un o’r gwyliau llenyddol mwyaf nodedig yn y byd

PEN yw’r sefydliad rhyngwladol ar gyfer awduron, ac mae’n gweithio tuag at amddiffyn rhyddid mynegiant, cefnogi awduron sy’n cael eu herlid, a hybu diwylliant llenyddol byd-eang. Salman Rushdie yw’r llywydd.

Dywedodd Gillian Clarke: “Mae’n fraint i mi gynrychioli Cymru mewn fforwm mor bwysig â hwn.

“Mae Cymru’n wlad fach, ond cofnodwyd y farddoniaeth gynharaf ym Mhrydain yn y Gymraeg, sef iaith fyw hynaf Ewrop.

“ Rhaid i ieithoedd lleiafrifol ffynnu mewn byd sy’n gynyddol homogenaidd i feithrin amrywiaeth a thrafod diwylliannol, gwleidyddol ac ethnig. Mae Cymru’n esiampl penigamp o wlad sy’n wirioneddol siarad mewn dwy iaith. Mae gennym gymaint i’w rannu.”

Cynhelir Gŵyl Lleisiau’r Byd PEN mewn lleoliadau amrywiol ar draws Efrog Newydd o 29 Ebrill tan 5 Mai.