Georgia Ruth yn tynnu’n ôl o weddill ei gigs dros yr haf yn sgil salwch ei gŵr

Mae’r gantores Georgia Ruth wedi cyhoeddi ei bod hi’n tynnu’n ôl o’i holl gigs dros yr haf.

Daw hyn wedi i’w gŵr Iwan Huws, prif leisydd y band Cowbois Rhos Botwnnog, gael ei daro’n wael yn ystod eu set yn Sesiwn Fawr Dolgellau yn gynharach y mis hwn.

Roedd hi eisoes wedi cyhoeddi na fydd hi’n chwarae yng Ngŵyl Latitude, a’i bod hi wedi gohirio ei gig yn Llundain yr wythnos hon.

Daeth y cyhoeddiad fore heddiw (dydd Llun, Gorffennaf 19) na fydd hi’n chwarae yn yr Eisteddfod Genedlaethol ym Mhontypridd, tafarn y Cŵps yn Aberystwyth, gŵyl Green Man na gŵyl Ara Deg ym Methesda.

Cafodd Iwan Huws ei gludo i Ysbyty Bronglais yn Aberystwyth, ac mae bellach mewn cyflwr “sefydlog” ac yn “derbyn y gofal gorau posib”.

Mewn neges ar y cyfryngau cymdeithasol, ymddiheurodd Georgia Ruth am fethu â chwarae gan ddweud ei bod “gobeithio gallu dod nôl i chwarae nhw eto yn y dyfodol”.

“Mae Iws yn dod adre heddiw!” meddai ar y cyfryngau cymdeithasol.

“Methu diolch ddigon i holl staff Bronglais am eu gofal a’u gwaith trylwyr dros y deg diwrnod dwetha.

“Diweddariad bach o ran gigs: fydda’i ddim yn chwarae Steddfod, Cŵps Aber, Green Man na Ara Deg – mor sori, ond gobeithio gallu dod nôl i chwarae nhw eto yn y dyfodol.”