Llywodraeth Cymru’n cefnogi gigs mewn tafarnau cymunedol ar Ddydd Miwsig Cymru

Llun parth cyhoeddus CC0 trwy www.pixabay.com

Mae Llywodraeth Cymru’n cefnogi cyfres o gigs mewn tafarnau cymunedol ar Ddydd Miwsig Cymru heddiw (dydd Gwener, Chwefror 9).

Mae cerddoriaeth yn ffordd wych o ddod â phobl at ei gilydd a mwynhau yn Gymraeg, yn ôl Jeremy Miles, Gweinidog y Gymraeg ac Addysg, yn Llywodraeth Cymru.

“Mae tafarndai cymunedol yn fusnesau cymdeithasol sydd wedi eu gwreiddio yn ein cymunedau ni,” meddai.

“Maen nhw’n creu swyddi yn ogystal â chyfleoedd i bobl ddod at ei gilydd i gymdeithasu a defnyddio’r Gymraeg.

“Drwy’r cynllun Grantiau Bach Prosiect Perthyn, mae Llywodraeth Cymru’n rhoi cefnogaeth i grwpiau cymunedol sefydlu tafarndai cydweithredol newydd, ac rwy’n falch iawn o’r cyfle i roi hwb i’r mentrau cydweithredol hyn eleni drwy noddi gigs ar Ddydd Miwsig Cymru.

“Mae Dydd Miwsig Cymru yn ddathliad gwych o rym a phwysigrwydd iaith a cherddoriaeth.

“Mae’r Gymraeg yn perthyn i i ni i gyd, ac mae digwyddiadau fel rhain yn ffordd wych i bobol gymryd rhan mewn gweithgareddau Cymraeg, i glywed yr iaith mewn lleoliad anffurfiol ac i hybu ei defnydd yn ein cymunedau.”

Morgan Elwy yn Rhuthun

Un dafarn gymunedol sy’n cynnal gig – gyda’r cerddor poblogaidd Morgan Elwy – yw tafarn Glan Llyn yng Nghlawddnewydd ger Rhuthun.

“Mae’n bwysig iawn cynnal digwyddiadau Cymraeg ar gyfer pobol yn yr ardal yma, ac yn enwedig i bobol ifanc,” meddai Eryl Williams o Fenter Gymunedol Clawddnewydd, Clocaenog a Derwyn, sy’n trefnu’r gig.

“Mae’n ffordd dda iddyn nhw gael cyfle i fwynhau cerddoriaeth Gymraeg, a defnyddio’r iaith y tu allan i’r ysgol.

“Y gobaith yw y bydd Dydd Miwsig Cymru’n rhoi blas iddyn nhw ar gerddoriaeth Gymraeg fel y bydd eu diddordeb yn parhau yn y dyfodol.”