Mae BBC Radio Cymru a’r Eisteddfod Genedlaethol wedi cyhoeddi rhestr fer Gwobr Albwm Cymraeg y Flwyddyn.
Bwriad y wobr ydi dathlu’r gerddoriaeth sydd wedi cael ei gynhyrchu yng Nghymru dros y flwyddyn ddiwethaf.
Cafodd y rhestr fer ei gyhoeddi’n swyddogol ar raglen Huw Stephens ar Radio Cymru.
Mae disgwyl i ragor o wybodaeth gael ei gyhoeddi am y wobr yn ystod yr wythnosau nesaf.
Bu panel o feirniaid sy’n rhan o’r diwydiant cerddoriaeth yn dewis a dethol eu hoff albymau cyn pleidleisio am eu ffefrynnau ar ddiwedd y broses.
Y beirniaid eleni yw Dylan Cernyw, Dylan Hughes, Dylan Jenkins, Eilir Owen Griffiths, Ifan Davies, Marged Gwenllian, Marged Rhys, Nia Mai Daniel, Rhiannon Lewis a Tegwen Bruce Deans.
Bydd yr enillydd yn cael ei gyhoeddi yn ystod Eisteddfod AmGen 2021, sy’n cael ei gynnal o 31 Gorffennaf – 7 Awst.
Yr albymau sydd wedi dod i’r brig eleni ydi:
- Carw – Maske (Recordiau BLINC Records).
- Mas – Carwyn Ellis & Rio 18 (Banana & Louie)
- Cwtsh – Gyda’n Gilydd
- Datblygu – Cwm Gwagle (Ankstmusik).
- Elfed Saunders Jones – Gadewaist (Klep Dim Trep).
- Jac Da Trippa – Kim Chong Hon (Recordiau Noddfa).
- Mared – Y Drefn (Recordiau I KA CHING Records).
- Mr – Feiral (Strangetown Records).
- Mr Phormula – Tiwns (Recordiau Mr Phormula).
- Tomos Williams – Cwmwl Tystion (Tŷ Cerdd).
“Er iddi fod yn flwyddyn anodd iawn i’r diwydiannau creadigol, mae safon yr albymau a ryddhawyd yn ystod y cyfnod o 31 Mai 2020 hyd at ddiwedd Mai eleni, yn arbennig o uchel, gyda chymysgedd amrywiol o gynnyrch ac artistiaid yn cyrraedd y rhestr fer,” meddai’r Eisteddfod Genedlaethol a BBC Radio Cymru mewn datganiad.
