Cyngor Sir Ceredigion yn cyhoeddi canllawiau ar gyfer croesawu myfyrwyr prifysgol

Mae Cyngor Sir Ceredigion wedi cyhoeddi canllawiau ar gyfer croesawu myfyrwyr prifysgol yn ôl yr wythnos hon.

Daeth hyn gyda rhybudd bod achosion o’r coronafeirws ar gynnydd yn y sir.

Mae’r Cyngor hefyd yn annog unrhyw fyfyrwyr sydd heb gael eu brechu i fynd am bigiad.

Gall myfyrwyr Prifysgol Aberystwyth a Phrifysgol Cymru y Drindod Dewi Sant gael brechiad yn Llyfrgell Thomas Parry, Campws Llanbadarn, Prifysgol Aberystwyth, neu yn Ysgol Trewen, Cwm-cou.

“Er mwyn cynnal diogelwch pawb, mae Cyngor Sir Ceredigion wedi bod yn cydweithio â Phrifysgol Aberystwyth a Phrifysgol Cymru y Drindod Dewi Sant, sydd â champws yn Llanbedr Pont Steffan, Bwrdd Iechyd Prifysgol Hywel Dda a phartneriaid eraill i sicrhau bod mesurau ar waith i ddiogelu myfyrwyr, trigolion lleol ac ymwelwyr fel ei gilydd,” meddai’r cyngor mewn datganiad.

“Mae achosion o’r coronafeirws yn parhau i gynyddu yn y sir, felly anogir pawb i fod yn wyliadwrus a dilyn y canllawiau diweddaraf i ddiogelu ei gilydd.

“Gall myfyrwyr ddod o hyd i’r wybodaeth ddiweddaraf am y trefniadau o ran Covid-19 yn eu prifysgol ar wefan Prifysgol Aberystwyth a Phrifysgol y Drindod Dewi Sant.

“Os bydd unigolyn yn datblygu unrhyw symptomau o’r coronafeirws, rhaid hunanynysu yn syth am 10 diwrnod a threfnu prawf PCR.”