Mae disgwyl y bydd yr Ysgrifennydd Ynni’n cyhoeddi na fydd yn cefnogi codi morglawdd cynhyrchu trydan tros aber afon Hafren.
Ond, yn ôl papur yr Independent on Sunday, fe fydd yn rhoi’r hawl i godi wyth gorsaf niwclear newydd, gan gynnwys un yn yr Wylfa.
Mae’r safleoedd eisoes wedi eu nodi ond fe fyddai’n rhaid i fusnesau preifat godi’r gorsafoedd gyda’u harian eu hunain, heb sybsidi.
‘Glo glân’ hefyd
Y gred yw y bydd Chris Huhne hefyd yn cefnogi rhagor o ffermydd gwynt a gorsafoedd pŵer sy’n defnyddio ‘glo glân’.
Fe allai’r penderfyniadau achosi rhagor o ddadlau oddi mewn i’w blaid, y Democratiaid Rhyddfrydol.
Roedd Chris Huhne ei hun wedi ymgyrchu’n erbyn rhagor o ynni niwclear adeg yr Etholiad Cyffredinol.
Adroddiad am y morglawdd
Mae i fod i wneud datganiad am ddyfodol ynni yng ngwledydd Prydain yn y Senedd fory ac fe fydd yr adroddiad ar gynlluniau’r morglawdd yn cael ei gyhoeddi hefyd.
Roedd hwnnw wedi ystyried pum cynllun gwahanol, gan gynnwys morglawdd deng milltir o Gaerdydd i Weston Super Mare yn Lloegr.
Er bod darogan y gallai hwnnw roi trydan i un o bob 20 o gartrefi gwledydd Prydain, fe fyddai hefyd wedi disodli cynefinoedd tua 65,000 o adar ac effeithio ar fusnesau a physgota yn uwch ar yr afon.
Fe fydd yr adroddiad hefyd yn sôn am ddau forglawdd llai a dau forlyn ynni – yn ôl yr Independent, mae Chris Huhne yn debyg o gefnogi datblygu technolegau gwahanol fel technoleg dal carbon.
Llun: Llun arlunydd o un o’r syniadau ar gyfer morglawdd Hafren (Cyhoeddus)
