Mae banc HSBC wedi cyhoeddi elw cyn trethi o £7bn am chwe mis cyntaf 2010.
Mae elw’r cwmni wedi codi 121% gyda dyledion drwg yn disgyn i’w lefel isaf ers i’r dirwasgiad ddechrau.
Dywedodd HSBC bod colledion ar fenthyciadau wedi lleihau 46% ond roedd cyllid masnachu wedi cael ei daro gan anwadalwch y farchnad stoc.
Fe nododd y banc bod benthyciadau wedi cynyddu 4% ar draws pob un o’u rhanbarthau ers diwedd llynedd.
Fe gynyddodd cyfranddaliadau HSBC 4% ar ôl i’r newyddion o’u helw cael eu cyhoeddi.
Mae Ysgrifennydd Busnes Llywodraeth San Steffan, Vince Cable wedi galw ar fanciau i fenthyg mwy i fusnesau bach.
Ond mae’r banciau’n dweud bod y nifer o fenthyciadau y maen nhw’n gallu eu caniatáu yn cael ei gyfyngu oherwydd rheolau sy’n ei gwneud hi’n ofynnol iddyn nhw gael symiau mwy o gyllid ar eu mantolenni.
