Mae yna sïon bod hyfforddwr tîm dan 20 Cymru, Phil Davies, ar fin ymuno gyda staff hyfforddi Worcester.
Mae ar ddeall bod Davies wedi cael cynnig rôl hyfforddwr blaenwyr y clwb o Gaerwrangon gan brif hyfforddwr newydd y clwb, Richard Hill.
Fe gymerodd Hill yr awenau oddi wrth y Cymro arall, Mike Ruddock, ym mis Mai – fe ymddiswyddodd Ruddock ar ôl i Gaerwrangon ddisgyn allan o Uwch Gynghrair Lloegr.
Yn yr Ariannin
Mae Phil Davies ar hyn o bryd yn arwain Cymru ym Mhencampwriaeth Ieuenctid y Byd yn yr Ariannin ac fe allai’r newyddion ei fod yn gadael Cymru gael effaith ar eu paratoadau.
Fe fyddai ymadawiad Phil Davies yn ergyd i Undeb Rygbi Cymru ar ôl i gyn hyfforddwr y Scarlets gael ei benodi’n rheolwr cyntaf yr academi genedlaethol – rôl y mae wedi ei chyfuno gyda hyfforddi’r tîm dan 20.
Mae Richard Hill wedi cadarnhau ei fod yn chwilio am staff hyfforddi ond dyw e ddim wedi enwi Phil Davies yn benodol.
