Mae clwb arall o’r Eidal wedi ymuno yn y ras i arwyddo cefnwr Cymru, Gareth Bale.
Mae dau glwb Milan eisoes wedi dangos diddordeb yn chwaraewr Tottenham, ond nawr mae Roma hefyd wedi dweud y bydden nhw’n ystyried ei arwyddo.
Maen Roma eisiau cefnwr i gystadlu gyda chyn-chwaraewr Lerpwl, John Arne Riise. Mae’n debyg mai ar fenthyg byddai Roma am arwyddo’r Cymro.
Ond byddai AC Milan ac Inter gyda diddordeb i sicrhau cytundeb parhaol.
Mae AC Milan yn chwilio o ddifri’ am gefnwr chwith newydd, ar ôl i’r ymdrech i arwyddo chwaraewr Porto, Aly Cissokho, ddod i ben ar ôl iddo fethu archwiliad meddygol.
Pe bai Bale ar gael, fe fydd Birmingham hefyd â diddordeb ynddo.
Mae Harry Redknapp yn ffafrio’r Ffrancwr, Benoit Assou-Ekotto, o flaen Bale ar hyn o bryd, ac efallai y bydd rhaid i’r Cymro adael er mwyn cael chwarae’n gyson ar y lefel uchaf.
(Llun: PA)
