Roedd dyn o Brydain ymhlith pedwar o bobl fu farw mewn tân mewn clwb nos ar ynys Phuket yng Ngwlad Thai, meddai’r heddlu yno.
Cafodd corff Michael Pio Tzouvanni, 24, ei adnabod gan arbenigwyr fforensig trwy ddefnyddio cofnodion deintyddol yn ysbyty’r heddlu yn Bangkok.
Dywedodd yr heddlu bod Michael Tzouvanni wedi marw o ganlyniad i anadlu mwg yn ystod y tân yn y Tiger Discotheque ar draeth Patong ddydd Gwener ddiwethaf.
Mae’r heddlu’n aros am ganlyniadau profion DNA i geisio adnabod tri o bobl eraill fu farw yn y tân.
Cafodd o leiaf 11 o bobl eu hanafu yn y digwyddiad.
