Gorsaf niwclear Fukushima
Mae asiantaeth diogelwch niwclear Japan wedi dweud fod difrifoldeb yr argyfwng yng ngorsaf niwclear Fukushima Dai-ichi ar yr un lefel a thrychineb Chernobyl.
Dywedodd swyddog o Gomisiwn Diogelwch Niwclear Japan, wrth siarad ar deledu’r wlad, fod graddfa difrifoldeb yr argyfwng wedi ei ddyrchafu o bump i saith.
Ond fe ychwanegodd y swyddog fod cyfanswm yr ymbelydredd sy’n gollwng o’r orsaf niwclear tua 10% faint oedd wedi gollwng o Chernobyl yn ystod y trychineb yn 1986.
Mae lefel 7 yn dynodi “damwain difrifol” â “canlyniadau pellgyrhaeddol”. Dyna’r lefel uchaf ar y raddfa gafodd ei greu gan banel o arbenigwyr o’r Asiantaeth Egni Atomig Rhyngwladol yn 1989.
“Rydyn ni wedi dyrchafu’r argyfwng i lefel 7 oherwydd effaith pellgyrhaeddol yr ymbelydredd ar yr awyr, llysiau, dŵr tap a’r môr,” meddai Minoru Oogoda o Asiantaeth Diogelwch Niwclear a Diwydiannol Japan.
Ffrwydrodd adweithydd Chernobyl, yn y Wcráin, ar 26 Ebrill, 1986, gan daenu cwmwl o ymbelydredd dros y rhan mwyaf o Hemisffer y Gogledd.
Syrthiodd yr ymbelydredd gyda’r glaw gan effeithio ar sawl rhan o Brydain, gan gynnwys gogledd-orllewin Cymru. Mae yna gyfyngiadau ar 355 o ffermydd yn yr ardal o hyd.
Cafodd gorsaf niwclear Fukushima Dai-ichi ei ddifrodi gan y daeargryn 9.0 ar y Raddfa Richer a’r tsunami ar 11 Mawrth eleni.
