Protestwyr yn Burundi
Mae milwyr arfog wedi cael eu hanfon i brifddinas Burundi i geisio tawelu protestwyr sy’n gwrthwynebu cais yr Arlywydd am drydydd tymor.
Fe fethodd ymdrech i gipio rheolaeth o’r llywodraeth y penwythnos diwethaf.
Yn ardal Musaga yn y brifddinas Bujumbura, mae milwyr gyda gynnau wedi dod wyneb yn wyneb a channoedd o brotestwyr sy’n galw ar yr Arlywydd Pierre Nkurunziza i roi’r gorau i’w benderfyniad i geisio am dymor arall.
Mae nifer o’r protestwyr yn dweud ei fod yn anghyfansoddiadol.
Yn ôl adroddiadau, roedd y milwyr wedi tanio gynnau at y protestwyr.
Fe ddechreuodd y protestiadau yn y wlad ar 26 Ebrill ac mae disgwyl i’r etholiad arlywyddol gael ei chynnal ar 26 Mehefin.
Yn ôl y Cenhedloedd Unedig mae 105,000 o bobl Burundi wedi ffoi i wledydd cyfagos yn ddiweddar.
