Cytundeb cydweithio Llywodraeth Cymru a Phlaid Cymru yn “bygwth chwalu’r Deyrnas Unedig”

Mae’r cytundeb cydweithio rhwng Plaid Cymru a Llywodraeth Cymru yn “bygwth chwalu’r Deyrnas Unedig”, yn ôl Simon Hart, cyn-Ysgrifennydd Cymru.

Gwnaeth Aelod Seneddol Gorllewin Caerfyrddin a De Sir Benfro, oedd yn Ysgrifennydd Cymru cyn ymddiswyddo fis diwethaf, yr honiad mewn erthygl yn y Telegraph.

Mae e hefyd wedi datgan ei gefnogaeth i Rishi Sunak yn y ras i olynu Boris Johnson fel Prif Weinidog y Deyrnas Unedig, gan ddweud yn yr erthygl y byddai’n hapus i ymyrryd ar faterion datganoledig.

Mae’r erthygl wedi’i chyd-lofnodi gan yr Aelodau Seneddol Ceidwadol Craig Williams, Fay Jones, Jamie Wallis, Stephen Crabb, Alun Cairns a Simon Baynes, yn ogystal ag Aelodau o Senedd Cymru – Sam Rowlands, Peter Fox, Natasha Asghar, Darren Millar, Gareth Davies a Russell George.

‘Anhrefn cyfansoddiadol’

“Gyda Chytundeb Cydweithio Llywodraeth Cymru a Phlaid Cymru yn bygwth chwalu’r Deyrnas Unedig ac anhrefn cyfansoddiadol, mae angen arweinyddiaeth gref a llywodraeth fwyafrifol Geidwadol i symud Cymru yn ei blaen,” meddai Simon Hart yn yr erthygl.

“Llywodraeth Rishi fyddai’r llywodraeth Deyrnas Unedig fwyaf gweithgar yng Nghymru yn hanes datganoli, ac yn wahanol i Lywodraeth Lafur Cymru, bydd buddsoddi mewn trefi a chymunedau ledled Cymru.

“Y gwir amdani yw y dylai rhywun yn Aberystwyth neu Abersoch gael yr un cyfleoedd â rhywun yn Llundain, Leeds neu Fryste.

“Ni all yr etifeddiaeth o ddatganoli ac anghofio barhau.

“Mae Rishi eisiau gyrru Cymru yn ei blaen fel rhan o Deyrnas Unedig sy’n ffynnu.

“Yn ystod pandemig Covid-19, fe welodd Rishi o lygad y ffynnon sut yr oedd Llywodraeth Cymru yn awyddus i fynd yn groes Lywodraeth y Deyrnas Unedig lle bynnag y gallan nhw.

“Dyw hi ddim yn gyfrinach bod canran uwch o’r boblogaeth wedi marw o Covid-19 yng Nghymru nag unrhyw ran arall o’r Deyrnas Unedig dan bolisïau Llywodraeth Cymru.”