Mae elusen blant fwya’ gwledydd Prydain yn galw ar awdurdodau a llywodraethau i wneud mwy i amddiffyn pobl ifanc rhag cael eu masnachu yn y wlad ar gyfer rhyw.
Yn ystod mis Medi 2012 cynhaliwyd arolwg o’r plant hynny roedd gwasanaethau camfanteisio’n rhywiol ar blant y mae Barnardo’s yn gweithio gyda nhw.
Datgelodd hynny fod nifer y bobl ifanc roedd yr elusen yn gwybod a oedd yn cael eu masnachu yn y wlad wedi codi 84% – o 76 i 140 o blant.
Cynnydd yng Nghymru
Datgelodd yr arolwg, yng Nghymru, fod nifer y plant sy’n dioddef camfanteisio rhywiol ac sydd mewn perygl o ddioddef camfanteisio rhywiol ac sy’n cael eu helpu gan Barnardo’s Cymru wedi codi 377%, o 22 i 83.
“Yng Nghymru dros y flwyddyn ddiwethaf, mae gwaith partneriaeth agosach gyda’r heddlu ac awdurdodau lleol wedi arwain at gynnydd o ran adnabod y risg ac achosion o blant yn dioddef camfanteisio rhywiol,” meddai Yvonne Rodgers, Cyfarwyddwr Barnardo’s Cymru.
“Mae angen i ni barhau â’r patrwm o gyfeirio plant at ein gwasanaeth, a gweld awdurdodau heddlu Cymru yn defnyddio eu hystod lawn o dactegau gorfodi’r gyfraith ac ymyrryd i arestio a rhwystro’r rheini sy’n cam-drin, ac amddiffyn plant rhag y cam-drin erchyll hwn.
“Mae’r broblem hon wedi bod yn gudd yn rhy hir,” meddai.
“Rydym yn galw ar y Comisiynwyr Heddlu a Throseddu yng Nghymru i fynd i’r afael ag achosion o fasnachu plant yn ddomestig er mwyn camfanteisio’n rhywiol arnynt, drwy sicrhau bod yr heddlu yn cyflawni eu cyfrifoldebau i amddiffyn ac i gefnogi’r grŵp agored i niwed hwn.”
