Afon Teifi
Mae ci wedi achub bywyd ei berchennog ar ôl iddi syrthio i Afon Teifi.
Mae’n debyg mai cyfarth y ci a dynnodd sylw pobol i alw’r gwasanaethau brys i’r digwyddiad ger gwesty Hammet House yn Llechryd yng Ngheredigion.
Cafodd Gwasanaeth Tân Ac Achub Canolbarth a Gorllewin Cymru eu galw i’r digwyddiad am 7.49 bore yma – roedd y wraig wedi syrthio i’r afon wrth fynd â’i chi am dro.
Roedd aelodau o Dimoedd Achub Dŵr Swift Aberystwyth a Chaerfyrddin yno ynghyd â Heddlu Dyfed Powys.
Cafodd y ddynes ei chludo i’r ysbyty ond dyw hi ddim mewn cyflwr difrifol.
