Fe ddylai deintyddion holi eu cleifion a ydyn nhw’n yfed gormod o alcohol, yn ôl ymchwilwyr o Brifysgol Caerdydd.
Maen nhw’n dweud y gall deintyddion wneud llawer i adnabod peryglon, sy’n cynnwys sawl math o ganser yn y geg a’r gwddw.
Fe gafodd y casgliadau eu cyhoeddi yng nghylchgrawn deintyddol Coleg y Llawfeddygon, gan argymell fod holiaduron yn cael eu rhoi i gleifion cyn iddyn nhw weld y deintydd.
Peryglon
Yn ogystal ag afiechydon, fe all yfed gormod arwain at ddirywiad yn y dannedd, meddai’r adroddiad, ac mae peryg i gleifion gwympo a chael niwed i’w hwynebau.
“Fe all gor-ddefnydd o alcohol arwain at ganser yn y geg, y laryncs a’r oesophagus ac efallai mai deintyddion fydd y cyntaf i sylwi ar y cyflyrau yma,” meddai Jonathan Shepherd, Athro llawfeddygaeth y geg yn Ysgol Ddeintyddiaeth Prifysgol Caerdydd.
“Rhaid i ni gyflwyno arf i sgrinio am alcohol sy’n gallu adnabod yfed peryglus a niweidiol, yn ogystal â chynnig triniaeth effeithiol.”
‘Angen cydweithio’
Yn ôl Jonathan Shepherd, fe ddylai’r Llywodraeth a deintyddion gydweithio ar gynllun sgrinio.
Roedd yn honni bod un o bob pump o ddynion ac un o bob saith o ferched yn cael sesiynau trwm o yfed yn rheolaidd.
