Wylfa
Mae’r Prif Weinidog Carwyn Jones, wedi dweud fod eisoes ddiddordeb gan gwmnïoedd eraill i barhau â’r gwaith o adeiladu Wylfa B.
Datgelwyd ddoe bod cwmnïoedd RWE ac E.ON wedi penderfynu peidio parhau â’u cynlluniau i adeiladu gorsaf niwclear Wylfa B ar Ynys Môn.
Mae’r cwmnïoedd yn edrych am berchennog newydd ar gyfer Horizon Nuclear Power, y cwmni sy’n datblygu’r safle.
Dywedodd Volker Beckers, prif weithredwr RWE Npower, fod Cymru yn parhau’n un o’r llefydd “mwyaf atyniadol” i leoli gorsafoedd niwclear yn Ewrop.
“Byddai buddsoddwr arall yn gallu neidio’r ciw. Fe fyddwn nhw’n elwa o’r gwaith gwych yr ydym ni wedi ei wneud dros y blynyddoedd.”
Dywedodd Carwyn Jones bod Llywodraeth Cymru wedi derbyn un cais gan gwmni oedd â diddordeb yn y datblygiad yn fuan iawn ar ôl y cyhoeddiad.
Roedd Carwyn Jones hefyd wedi trafod â’r ysgrifennydd ynni Ed Davey ynglŷn â sut orau i ymateb i benderfyniad y cwmnïoedd Almaenaidd.
Cael Wylfa i’w wely
“Rydyn ni’n ymwybodol fod llawer iawn o ddiddordeb yn safle Wylfa B,” meddai.
“Rydyn ni’n gobeithio denu buddsoddiad i Ynys Môn er mwyn sicrhau bod yr adweithydd yn cael ei adeiladu a 600 o swyddi yn cael eu cadw a swyddi eraill yn cael eu creu.
“Fe fyddwn ni’n gweithio yn hynod o galed ar y cyd â Llywodraeth San Steffan, sydd o’r un farn â ni am hyn, er mwyn sicrhau bod yr adweithydd yn cael ei adeiladu.
“Mae’n amhosib gwybod ar hyn o bryd i le y bydd hyn yn arwain.
“Dydw i ddim am i bobol godi eu gobeithion yn ormodol ond mae o yn galonogol fod ddiddordeb helaeth mewn buddsoddi yn Wylfa B.
“Ond mae yna ffordd beth i fynd eto.”
