Mae cwpl wnaeth gadw eu plentyn dyflwydd oed mewn cawell yn ei lofft wedi derbyn dedfryd o garchar wedi’i gohirio.
Roedd y rhieni’n cadw’r bachgen dyflwydd oed o Gwmbrân wedi’i gloi mewn cawell yn ei lofft yn gyson ac wedi rhoi’r llysenw “plentyn y diafol” i’w mab.
Fe wnaeth yr Heddlu ddarganfod y bachgen wedi’i gloi mewn cawell ar ôl derbyn galwad gan gymdogion fis Chwefror eleni.
Roedd teganau, blanced a photel babi yn y gawell hefyd – wedi’u gorchuddio mewn ysgarthion. Yn ôl meddygon, roedd crafiadau a chleisiau ar gorff y bachgen.
Fe wnaeth ei rieni ymddangos yn Llys y Goron Casnewydd ddoe ar ôl cyfaddef ei drin yn wael.
Fe gafodd y ddau 26 wythnos yn y carchar – wedi’i ohirio am ddwy flynedd gan y Barnwr, David Morris.
Fe gafodd y ddau orchymyn i wneud 200 awr o waith di-dâl ac maen nhw wedi derbyn gorchymyn goruchwyliaeth dwy flynedd.
Maen nhw hefyd wedi’u gwahardd rhag gweithio gyda phlant.
Mae mab y cwpl wedi’i roi mewn gofal maeth.
